دنیا کے طاقتور ترین پاسپورٹ کا اعزاز کس ملک کو حاصل ہے؟

نوماڈ کیپیٹلسٹ کی نئی پاسپورٹ درجہ بندی کی فہرست کے مطابق دنیا کا طاقتور ترین پاسپورٹ آئرلینڈ کا ہے۔

اس فہرست میں پاسپورٹس کی درجہ بندی پانچ مختلف شعبوں کو مدنظر رکھتے ہوئے کی گئی ہے، جن میں ویزا فری سفر، شہریوں پر ٹیکس، دوہری شہریت، ذاتی آزادی اور عالمی رائے شامل ہیں۔

آئرلینڈ کا پاسپورٹ اس فہرست میں پہلے نمبر پر آیا، جس کے ذریعے آئرلینڈ کے شہری 176 ممالک میں ویزا کے بغیر سفر کر سکتے ہیں۔ آئرلینڈ کو مجموعی طور پر 109 اسکور ملا، جبکہ اس کے شہریوں کیلئے دیگر شعبوں میں بھی صورتحال دوسرے ممالک سے بہتر ہے۔

یونان اور سوئٹزرلینڈ 108 اسکور کے ساتھ مشترکہ طور پر دوسرے نمبر پر رہے، جبکہ پرتگال چوتھے نمبر پر آیا۔ پرتگال اور مالٹا پانچویں جبکہ لگسمبرگ، فن لینڈ اور ناروے ساتویں نمبر پر رہے۔ متحدہ عرب امارات، نیوزی لینڈ اور آئس لینڈ نے دسواں نمبر حاصل کیا۔

دلچسپ بات یہ ہے کہ جاپان اور سنگاپور اس فہرست میں نسبتاً نیچے ہیں، کیونکہ وہاں دوہری شہریت اور ٹیکس کی پالیسیوں میں دیگر ممالک کے مقابلے میں کچھ مشکلات ہیں۔

پاکستان 199 ممالک کی فہرست میں 195 ویں نمبر پر رہا۔ جبکہ اس سے نیچے عراق (196)، اریٹیریا (197)، یمن (198) اور افغانستان (199) ہیں۔