پاکستانی فضائی حدود کی بندش سے بھارتی ایئرلائنز کو 200 کروڑ روپے کا نقصان

کراچی: پاکستان کی جانب سے فضائی حدود بند کیے جانے کے باعث بھارتی ایئرلائنز کو 10 روز میں 200 کروڑ روپے سے زائد کا نقصان ہوچکا ہے، جبکہ 1000 سے زائد پروازیں متاثر ہوئی ہیں۔

ائیر انڈیا، انڈیگو، اسپائس جیٹ، آکاسا اور ائیر انڈیا ایکسپریس سمیت متعدد بھارتی ایئرلائنز کو اپنی پروازیں منسوخ یا طویل راستوں سے گزارنے پر مجبور ہونا پڑا، جس سے فیول، عملے اور ری فیولنگ کے اخراجات دوگنا ہوگئے ہیں۔

دہلی، ممبئی، امرتسر، احمدآباد اور بنگلورو سے جانے والی پروازیں خاص طور پر متاثر ہوئیں، جبکہ امریکا جانے والی پروازوں کے عملے کو یورپ میں تبدیل کرنا پڑ رہا ہے۔ انڈیگو نے وسط ایشیائی ممالک کیلئے فضائی آپریشن بھی معطل کر دیا ہے۔

مسافروں کو نہ صرف پروازوں میں تاخیر کا سامنا ہے بلکہ کئی گھنٹوں کے اضافی سفر، منسوخی اور ریفنڈز نہ ملنے پر بھی سخت پریشانی کا شکار ہیں۔

یاد رہے کہ 2019 میں بھی فضائی حدود کی بندش سے بھارت کو 700 کروڑ روپے کا نقصان اٹھانا پڑا تھا۔