پاکستانی مسلح افواج کی کامیابی بے مثال ہے، قومی اتحاد کی نئی روح نے جنم لیا: خواجہ آصف

سیالکوٹ – وفاقی وزیر دفاع خواجہ محمد آصف نے اپنے آبائی شہر میں ایک نجی اسکول کے دورے کے دوران خطاب کرتے ہوئے کہا کہ پاکستان کی حالیہ فوجی کامیابی تاریخ کی سب سے بڑی کامیابیوں میں سے ایک ہے، جسے انہوں نے "ہمارے قومی تاریخ کی بے مثال فتح” قرار دیا۔

طلبہ اور اساتذہ سے خطاب کرتے ہوئے خواجہ آصف نے کہا، "گزشتہ 78 برسوں میں قوم نے کئی اہم لمحات دیکھے، لیکن حالیہ کامیابی، جو اللہ تعالیٰ کے فضل سے ممکن ہوئی، ناقابلِ فراموش ہے۔”

انہوں نے پاکستان آرمی کی کارروائی کو سراہتے ہوئے کہا کہ افواجِ پاکستان نے بہادری اور پیشہ ورانہ صلاحیتوں کا شاندار مظاہرہ کیا۔ مشرقی سرحد پر حالیہ کشیدگی کا حوالہ دیتے ہوئے انہوں نے کہا، "ہمارا دشمن چند میل دور اپنے زخم چاٹ رہا ہے۔ جو دراڑیں دو ہفتے قبل ہمارے اتحاد میں دکھائی دے رہی تھیں، وہ آج افواجِ پاکستان کی قربانیوں کے باعث قومی یکجہتی میں بدل چکی ہیں۔”

وزیر دفاع نے پاک فوج کے سربراہ جنرل عاصم منیر، ایئر چیف مارشل ظہیر احمد بابر، نیول چیف ایڈمرل نوید اشرف اور چیئرمین جوائنٹ چیفس آف اسٹاف کمیٹی جنرل ساحر شمشاد مرزا کو دل کی گہرائی سے مبارکباد دی اور ان کی قیادت اور جرات کو خراجِ تحسین پیش کیا۔ انہوں نے کہا، "میں نے 1965 سے لے کر آج تک کے تمام تنازعات دیکھے ہیں، لیکن اس مرتبہ جو ایمانی قیادت اور جذبہ دیکھنے کو ملا، وہ اپنی مثال آپ ہے۔”

انہوں نے وزیر اعظم محمد شہباز شریف کے کردار کو بھی سراہا اور کہا کہ وزیر اعظم نے ہر قدم پر افواجِ پاکستان کے ساتھ کھڑے ہو کر مکمل حمایت فراہم کی۔ "وزیر اعظم نے قیادت کا حق ادا کیا اور یہ ثابت کیا کہ حکومت اور قوم اپنی افواج کے شانہ بشانہ کھڑی ہے۔”

اساتذہ سے خطاب کرتے ہوئے خواجہ آصف نے قومی تاریخ کو محفوظ رکھنے اور نئی نسل کو وطن سے محبت اور قربانیوں کا شعور دینے پر زور دیا۔ "یہ ہماری ذمہ داری ہے کہ ہم بچوں کو بتائیں کہ پاکستان کس قربانی سے حاصل ہوا اور اسے محفوظ رکھنے کے لیے کن کن آزمائشوں سے گزرنا پڑا،” انہوں نے کہا۔