پاکستان اور افغانستان کے درمیان دوطرفہ تعلقات، تجارت اور مہاجرین کے مسائل پر تبادلہ خیال

کابل: افغانستان کے لیے پاکستان کے خصوصی نمائندے، سفیر محمد صادق، نے ہفتے کے روز کابل میں افغان وزیر خارجہ مولوی امیر خان متقی سے ملاقات کی، جس میں دوطرفہ تعلقات، تجارت، اور ٹرانزٹ سمیت باہمی دلچسپی کے امور پر تبادلہ خیال کیا گیا۔

دونوں فریقین نے سفارتی روابط کو مزید مضبوط بنانے اور قریبی تعاون کو فروغ دینے کے عزم کا اعادہ کیا۔ انہوں نے اعلیٰ سطحی مذاکرات کو مزید مستحکم کرنے پر بھی اتفاق کیا تاکہ دونوں ممالک کے درمیان تعلقات کو مزید فروغ دیا جا سکے۔

سفیر محمد صادق نے سوشل میڈیا پلیٹ فارم ایکس پر ایک بیان میں پاکستان کی افغانستان کے ساتھ تعمیری اور باہمی مفاد پر مبنی تعلقات برقرار رکھنے کے عزم کو دہرایا۔

افغان میڈیا کے مطابق، وزیر خارجہ متقی نے اس بات پر زور دیا کہ تجارت اور ٹرانزٹ میں حائل رکاوٹوں کو غیر متعلقہ مسائل سے جوڑنا کسی بھی فریق کے مفاد میں نہیں ہے۔ ملاقات میں افغان مہاجرین کی باوقار اور تدریجی واپسی کے معاملے پر بھی تبادلہ خیال کیا گیا، جس میں انسانی ہمدردی کی بنیاد پر تعاون کی ضرورت کو اجاگر کیا گیا۔