پاکستان اور بھارت جنگ بندی پر متفق، نائب وزیراعظم اسحاق ڈار کی تصدیق

نائب وزیراعظم اسحاق ڈار نے تصدیق کی ہے کہ پاکستان اور بھارت کے درمیان فوری جنگ بندی پر اتفاق ہو گیا ہے، جو آج شام 4 بج کر 30 منٹ سے نافذ العمل ہو چکی ہے۔

سماجی رابطے کی ویب سائٹ ایکس پر بیان میں اسحاق ڈار نے کہا کہ پاکستان نے ہمیشہ خطے میں امن و استحکام کو ترجیح دی ہے، تاہم اپنی خودمختاری اور علاقائی سالمیت پر کبھی سمجھوتہ نہیں کیا۔

انہوں نے مزید کہا کہ پاکستان نے واضح کیا تھا: "اگر بھارت رکے گا تو ہم بھی جواب نہیں دیں گے، مگر جارحیت کا مؤثر جواب دینا ہمارا حق ہے۔” اب دونوں ممالک باہمی مذاکرات کے ذریعے آگے بڑھنے پر آمادہ ہیں۔

اس موقع پر امریکی صدر ڈونلڈ ٹرمپ نے بھی ایکس پر پیغام میں اعلان کیا کہ پاکستان اور بھارت نے امریکی ثالثی میں رات بھر جاری رہنے والے مذاکرات کے بعد جنگ بندی پر اتفاق کر لیا ہے۔ انہوں نے دونوں ممالک کو "سمجھ داری اور بصیرت کا مظاہرہ کرنے” پر سراہا اور فیصلے کو خوش آئند قرار دیا۔