پاکستان اور ترکی کے درمیان آف شور توانائی معاہدہ

پاکستان کے توانائی کے شعبے کے لیے ایک بڑی پیشرفت میں، پاکستان اور ترکی نے مشترکہ بولی معاہدہ کیا ہے تاکہ پاکستان کے ساحلی علاقوں میں آف شور توانائی کے ذخائر کی تلاش کی جا سکے۔

یہ معاہدہ پاکستان منرلز انویسٹمنٹ فورم 2025 کے دوران طے پایا، جس سے دونوں ممالک کی اہم توانائی کمپنیوں کے درمیان ایک اسٹریٹجک شراکت داری کی بنیاد رکھی گئی۔

اس معاہدے کے تحت ترکی کی ریاستی ملکیت والی ترک پیٹرولیم کارپوریشن (TPAO) اور پاکستان کی سرکردہ دریافت اور پیداوار کمپنیوں بشمول ماری انرجیز لمیٹڈ، آئل اینڈ گیس ڈویلپمنٹ کمپنی لمیٹڈ (OGDCL) اور پاکستان پیٹرولیم لمیٹڈ (PPL) ایک ساتھ کام کریں گی۔

یہ شراکت داری پاکستان کے جاری آف شور بولی کے دور میں مشترکہ طور پر حصہ لینے کے لیے تشکیل دی گئی ہے، جس کا آغاز فروری 2025 میں ہوا۔ اس بولی کے تحت پاکستان کی حکومت نے مکران اور انڈس بیسنز میں 40 آف شور بلاکس کی تلاش کے لیے پیشکش کی ہے۔

وفاقی وزیر برائے پیٹرولیم، علی پرویز ملک نے معاہدے پر دستخط کا اعلان کرتے ہوئے امید ظاہر کی کہ یہ شراکت داری پاکستان کے توانائی کے شعبے میں غیر ملکی سرمایہ کاری اور بین الاقوامی ماہرین کی مہارت کے منتقلی کا دروازہ کھولے گی۔

وزیر نے کہا، "پاکستان اور ترکی کے درمیان یہ اسٹرٹیجک تعاون ہمارے آف شور توانائی کے وسائل کو کھولنے اور پاکستان کی عالمی توانائی مارکیٹ میں پوزیشن کو مضبوط بنانے میں مددگار ثابت ہوگا۔”