تیسرے ون ڈے میں بھی شکست دیکر نیوزی لینڈ نے پاکستان کو وائٹ واش کردیا

ماؤنٹ مونگانوئی میں کھیلے گئے تیسرے اور آخری ایک روزہ میچ میں نیوزی لینڈ نے پاکستان کو 43 رنز سے شکست دے کر ون ڈے سیریز 0-3 سے جیت لی۔

نیوزی لینڈ نے پاکستان کو 265 رنز کا ہدف دیا، لیکن پاکستانی ٹیم صرف 221 رنز بنا سکی اور 40 ویں اوور میں آؤٹ ہو گئی۔ بابراعظم 51 رنز کے ساتھ نمایاں رہے، جبکہ محمد رضوان 37، طیب طاہر 33 اور عبداللہ شفیق نے بھی 33 رنز بنائے۔ دیگر کھلاڑیوں میں عثمان خان 12، سلمان علی آغا 11، نسیم شاہ 17، فہیم اشرف 3 رنز تک محدود رہے۔

نیوزی لینڈ اور پاکستان کے درمیان یہ میچ بارش کی وجہ سے تقریباً 2 گھنٹے کی تاخیر سے شروع ہوا، جس کے بعد میچ 42 اوورز فی اننگز تک محدود کر دیا گیا۔ پاکستان نے ٹاس جیت کر نیوزی لینڈ کو پہلے بیٹنگ کی دعوت دی، جس پر نیوزی لینڈ نے 8 وکٹوں کے نقصان پر 264 رنز بنائے۔ کپتان مائیکل بریسویل 59 رنز کے ساتھ ٹاپ اسکورر رہے، جبکہ ماریو 58، ڈیرل مچل 43 اور ہینری نکلز 31 رنز کے ساتھ اہم اسٹرائیکر تھے۔

پاکستان کی جانب سے عاکف جاوید نے 4 وکٹیں حاصل کیں، نسیم شاہ نے 2، اور فہیم اشرف و سفیان مقیم نے 1،1 کھلاڑی کو آؤٹ کیا۔