پاکستان جب مارے گا تو پھر بھارتی میڈیا کی ضرورت نہیں، پوری دنیا جان جائے گی، ڈی جی آئی ایس پی آر

اسلام آباد: ڈی جی آئی ایس پی آر لیفٹیننٹ جنرل احمد شریف چوہدری نے کہا کہ پاکستان جب مارے گا تو پھر بھارتی میڈیا کی ضرورت نہیں، پوری دنیا جان جائے گی۔

نائب وزیر اعظم اسحاق ڈار کے ساتھ پریس بریفنگ کے دوران ڈی جی آئی ایس پی آر نے کہا کہ پاکستان نے حملہ کیا تو اس کی گونج پوری دنیا میں سنائی دے گی۔ انہوں نے گرائے جانے والے بھارتی ڈرونز کا ملبہ میڈیا پر دکھا دیا۔

ترجمان مسلح افواج نے کہا کہ بھارت کا پاکستان پر ڈرون حملوں کا الزام جھوٹ پر مبنی ہے۔ ڈرامے کیلئے کھیتوں میں رکھے پرزوں کے ساتھ کچھ آگ ہی لگا دیتے۔ بھارت ڈراموں کے ذریعے مذموم مقاصد حاصل کرنا چاہتا ہے۔ بھارت کا 15 مقامات پر حملے کا الزام مضحکہ خیز ہے۔

لیفٹیننٹ جنرل احمد شریف چوہدری نے کہا کہ افواج پاکستان نے دراندازی کرنے والے بھارت کے 29 ڈرونز مار گرائے ہیں۔ انہوں نے کہا کہ دنیا کا کونسا مذہب عبادت گاہوں اور مقدس کتابوں کو نشانہ بنانے کی اجازت دیتا ہے۔