پاک فوج نے بھارت کے مزید 48ڈرونز مار گرائے، تعداد 77 ہوگئی

راولپنڈی: بھارت کی جانب سے اسرائیلی ڈرونز کے ذریعے دراندازی کا سلسلہ دوسرے روز بھی جاری ہے، پاک فوج نے صبح سے لے کر اب تک مزید 48 ڈرونز مار گرائے ہیں، جس کے بعد گزشتہ رات سے اب تک گرائے جانے والے ڈرونز کی مجموعی تعداد 77 ہوگئی ہے۔

سکیورٹی ذرائع کے مطابق بھارت کے چھوڑے گئے 4 جدید اسرائیلی ہیروپ ڈرونز کو اوکاڑہ کینٹ کے علاقے میں آبادی سے کچھ فاصلے پر فصلوں میں گرا دیا گیا، تاہم خوش قسمتی سے کوئی جانی نقصان نہیں ہوا۔

ذرائع کا کہنا ہے کہ پاک فوج کی جانب سے ایک ڈرون وہاڑی اور ایک ڈرون پاکپتن میں تباہ کیا گیا۔

سکیورٹی ذرائع کے مطابق 8 مئی کی شام تک بھارت کے 29 ڈرونز کو مار گرایا گیا تھا، جبکہ کل رات سے لے کر آج دن تک مزید 48 ڈرونز تباہ کر دیے گئے ہیں، جس کے بعد مجموعی طور پر گرائے گئے ڈرونز کی تعداد 77 ہوگئی ہے۔

ڈی جی آئی ایس پی آر کے مطابق تمام ڈرونز مسلسل ریڈار پر مانیٹر کیے جا رہے تھے۔ انہوں نے کہا، "جب بھی کوئی ڈرون آتا ہے، اسے مسلسل ریڈار پر دیکھا جا رہا ہوتا ہے۔ ہمارے ایئر ڈیفنس سسٹم میں اتنی صلاحیت ہے کہ وہ چھوٹے ڈرونز کو بھی ٹریک کر لیتا ہے۔ شہری علاقوں اور کمرشل فلائٹس کی موجودگی میں ڈرون مار گرانے کے لیے ایک آپریشنل طریقہ کار ہے۔”

دفاعی ماہرین نے پاکستان کے دفاعی نظام اور ایئر ڈیفنس سسٹم کی تعریف کی ہے، جو دشمن کے حملوں کو مسلسل ناکام بنا رہا ہے۔

یاد رہے کہ بھارت نے گزشتہ روز بھی اسرائیلی ڈرونز کے ذریعے پاکستان میں دراندازی کی کوشش کی تھی، تاہم پاک فوج نے سوئفٹ اور ہارڈ ٹیکنالوجی کا استعمال کرتے ہوئے 29 ہیروپ ڈرونز مار گرائے تھے۔