پولیو کے خدشات کے باعث عالمی ادارہ صحت نے پاکستان پر سفری پابندیاں

عالمی ادارہ صحت (WHO) نے پاکستان میں پولیو وائرس کے پھیلاؤ پر تشویش کا اظہار کرتے ہوئے ملک پر عائد بین الاقوامی سفری پابندیوں میں مزید تین ماہ کی توسیع کر دی ہے۔

یہ فیصلہ 6 مارچ کو ہونے والے عالمی ادارہ صحت کی ایمرجنسی کمیٹی کے 41ویں اجلاس میں کیا گیا، جس میں پولیو سے متاثرہ ممالک کے حکام نے ویڈیو لنک کے ذریعے شرکت کی۔

اجلاس میں دنیا بھر میں پولیو وائرس کی موجودہ صورتحال کا جائزہ لیا گیا، خاص طور پر پاکستان میں وائرس کے پھیلاؤ اور حکومت کی روک تھام کی کوششوں پر توجہ دی گئی۔

کمیٹی کی رپورٹ کے مطابق پاکستان اور افغانستان اب بھی عالمی سطح پر پولیو کے خاتمے میں رکاوٹ بنے ہوئے ہیں، اور ان دونوں ممالک کو وائرس کے بین الاقوامی پھیلاؤ کا ذمہ دار قرار دیا گیا ہے۔

اگرچہ عالمی ادارہ صحت نے پاکستان کی قومی سطح پر انسدادِ پولیو مہمات میں بہتری کو سراہا، تاہم صوبائی اور ضلعی سطح پر اب بھی خامیاں موجود ہیں جنہیں دور کرنے کی ضرورت ہے۔

حیران کن طور پر، ملک میں پولیو وائرس کے ماحولیاتی نمونوں میں گزشتہ برس کے مقابلے میں بارہ گنا اضافہ ہوا ہے۔ 2025 کے آغاز سے اب تک ملک بھر سے 628 پولیو مثبت ماحولیاتی نمونے رپورٹ ہو چکے ہیں، جن میں کئی نئے اضلاع بھی شامل ہیں۔

پولیو وائرس کے YB3A4A B-کلسٹر کی سرگرم گردش خاص طور پر خیبر پختونخوا، سندھ اور بلوچستان کے صوبوں میں تشویش کا باعث بنی ہوئی ہے۔ کراچی، پشاور اور کوئٹہ جیسے بڑے شہری مراکز وائرس کے مرکزی گڑھ بن چکے ہیں۔

وائرس کی مسلسل موجودگی اس بات کا تقاضا کرتی ہے کہ وفاق، صوبوں اور ضلعی سطح پر مربوط اور مؤثر اقدامات کیے جائیں تاکہ پولیو کا مکمل خاتمہ ممکن ہو سکے۔