پوپ فرانسس کا بچوں کیلئے آخری تحفہ: پاپ موبائل غزہ کیلئے موبائل ہیلتھ یونٹ میں تبدیل

یروشلم: پوپ فرانسس نے وفات سے قبل اپنا ایک پاپ موبائل فلسطینی بچوں کی خدمت کیلئے موبائل ہیلتھ یونٹ میں تبدیل کرنے کیلئے عطیہ کیا تھا، جسے غزہ کے متاثرہ علاقوں میں طبی امداد کیلئے استعمال کیا جائے گا۔

ویٹیکن کی فلاحی تنظیم Caritas کی یروشلم اور سویڈن شاخوں نے اس تبدیلی کی تصاویر جاری کی ہیں۔ گاڑی میں تشخیص، معائنہ اور علاج کی سہولیات شامل ہوں گی، جن میں ٹیسٹنگ آلات، ویکسین، آکسیجن سپلائی، فرج اور دیگر طبی سامان نصب کیا جائے گا۔

Caritas کے مطابق جب غزہ کیلئے انسانی راہداری دوبارہ کھلے گی، یہ گاڑی فوری طبی امداد کیلئے تیار ہوگی۔

تنظیم کے سیکرٹری جنرل نے ایک بیان میں کہا کہ یہ گاڑی پوپ فرانسس کی محبت، ہمدردی اور ان افراد کیلئے قربت کی علامت ہے جو سب سے زیادہ متاثر ہوئے۔

یاد رہے کہ پوپ فرانسس نے غزہ جنگ کے دوران اسرائیلی فوج کے اقدامات پر کھل کر تنقید کی تھی، اور مسلسل غزہ کے عوام کی حالت زار پر آواز اٹھائی۔ وہ 21 اپریل کو 88 برس کی عمر میں وفات پا گئے تھے۔