پہلگام حملہ: بھارت کے پاس ثبوت نہیں، نیویارک ٹائمز کا انکشاف

امریکی اخبار نیویارک ٹائمز نے انکشاف کیا ہے کہ بھارت نے پہلگام حملے کے بعد غیر ملکی سفیروں کو دی گئی بریفنگ میں پاکستان کے خلاف کوئی ثبوت پیش نہیں کیا۔ رپورٹ کے مطابق، چار سفارتکاروں نے تصدیق کی کہ بھارت کے پاس پاکستان پر الزام لگانے کے لیے شواہد موجود نہیں۔

اخبار نے بتایا کہ بھارت نے اندرونی سیاسی دباؤ سے توجہ ہٹانے کے لیے پہلگام فالس فلیگ آپریشن کا سہارا لیا اور فوراً ہی پاکستان پر الزام دھر دیا۔ اس مقصد کے لیے مودی حکومت نے درجنوں عالمی رہنماؤں سے رابطے بھی کیے۔

رپورٹ میں کہا گیا کہ بھارت کشیدگی کم کرنے کے بجائے پاکستان کے خلاف فوجی کارروائی کا جواز تلاش کر رہا ہے۔ پانچ روز گزرنے کے باوجود بھارت نہ کسی تنظیم کو ذمہ دار ٹھہرا سکا اور نہ ہی پاکستان کے خلاف الزامات کا کوئی ثبوت پیش کر سکا۔

مزید یہ کہ بھارت نے سفارتی تعلقات محدود کرتے ہوئے عملے کو ملک بدر کیا، ویزے منسوخ کیے، جبکہ کشمیریوں کے خلاف کریک ڈاؤن اور انسانی حقوق کی خلاف ورزیاں بھی بڑھ گئی ہیں۔

نیویارک ٹائمز کے مطابق، نریندر مودی پر عسکری اقدام کا دباؤ بڑھتا جا رہا ہے، تاہم 2016 اور 2019 میں پاکستان کے مؤثر جوابی اقدامات کے بعد اس بار قدم اٹھانا آسان نہیں۔