پہلگام واقعے کے بعد بھارتی فوج میں اضطراب، سیکیورٹی صورتحال پر سوالات اٹھنے لگے

مقبوضہ کشمیر کے علاقے پہلگام میں ہونے والے حالیہ فالس فلیگ حملے کے بعد بھارتی فوج میں شدید بے چینی اور اضطراب کی لہر دوڑ گئی ہے۔ بھارتی میڈیا اور ذرائع کے مطابق، نادرن کمانڈ کے نئے سربراہ لیفٹیننٹ جنرل پراتک شرما کی قیادت میں سیکیورٹی معاملات کا جائزہ لینے کے لیے اعلیٰ سطحی ملاقات 28 اپریل 2025 کو سومنات ہال سرینگر میں منعقد ہوئی۔

ذرائع کے مطابق، اس ملاقات میں جنرل پراتک شرما نے مقبوضہ کشمیر میں تعینات آفیسرز اور جوانوں سے براہ راست گفتگو کی، تاہم فوجی اہلکار سیکیورٹی کی صورتحال اور حالیہ حملے پر سخت تحفظات کا اظہار کرتے نظر آئے۔

ایک افسر نے سوال اٹھایا کہ "سخت سیکیورٹی کے باوجود پہلگام حملہ کیسے ہوا؟” جبکہ دوسرے نے کہا، "اگر ہمیں آگے بھیجا جائے گا تو کنٹونمنٹ کی سیکیورٹی کی ذمہ داری کس پر ہو گی؟”

ذرائع کے مطابق، جنرل پراتک شرما اہلکاروں کے خدشات دور کرنے میں ناکام رہے، جس کے باعث بھارتی فوج کے اندر مایوسی، بےاعتمادی اور دباؤ میں اضافہ دیکھنے میں آ رہا ہے۔

علاوہ ازیں، پہلگام واقعے کے بعد جموں و کشمیر کے عوام میں بھی بھارتی فوج اور حکومت کے خلاف شدید غصہ پایا جا رہا ہے، جس نے خطے کی مجموعی صورتحال کو مزید حساس بنا دیا ہے۔

ذرائع کا کہنا ہے کہ بھارتی فوج کے اندر پیدا ہونے والا دباؤ نہ صرف سیکیورٹی انتظامات پر اثر انداز ہو رہا ہے بلکہ فوجی مورال پر بھی گہرے اثرات چھوڑ رہا ہے۔