اسلام آباد: حکومت نے آئندہ 15 روز کے لیے پیٹرولیم مصنوعات کی نئی قیمتوں کا اعلان کر دیا ہے، جس کے مطابق کچھ مصنوعات کی قیمتوں میں کمی کی گئی ہے جبکہ پیٹرول کی قیمت میں کوئی تبدیلی نہیں کی گئی۔
وزارت خزانہ کی جانب سے جاری نوٹیفکیشن کے مطابق پیٹرول کی فی لیٹر قیمت 252 روپے 63 پیسے برقرار رکھی گئی ہے۔ تاہم، ہائی اسپیڈ ڈیزل کی قیمت میں 2 روپے فی لیٹر کمی کی گئی ہے جس کے بعد اس کی نئی قیمت 254 روپے 64 پیسے فی لیٹر مقرر کی گئی ہے۔
مزید تفصیلات کے مطابق مٹی کے تیل کی قیمت میں 5 روپے 4 پیسے کی کمی کے بعد نئی قیمت 164 روپے 65 پیسے فی لیٹر ہوگئی ہے، جبکہ لائٹ ڈیزل کی قیمت میں 4 روپے 68 پیسے فی لیٹر کمی کی گئی ہے اور اب اس کی نئی قیمت 150 روپے 65 پیسے فی لیٹر ہوگی۔
یہ نئی قیمتیں 16 مئی سے 31 مئی 2025 تک نافذ العمل رہیں گی۔ حکومت کی جانب سے قیمتوں میں کمی کا یہ اقدام عالمی منڈی میں خام تیل کی قیمتوں میں تبدیلی اور عوام کو ریلیف فراہم کرنے کے تناظر میں کیا گیا ہے۔
