ملک میں پیٹرول سستا ہوگا یا مہنگا؟ عوام کیلئے بڑی خبر

اسلام آباد: حکومت آج (منگل) کو پیٹرولیم مصنوعات کی نئی قیمتوں کا اعلان کرے گی۔ عالمی مارکیٹ میں خام تیل کی قیمتوں میں کمی کے باوجود پاکستان میں قیمتوں میں صرف معمولی رد و بدل کی توقع ہے۔

تفصیلات کے مطابق اپریل کے اختتام پر عالمی منڈی میں برینٹ کروڈ آئل کی قیمت 64 ڈالر اور امریکی کروڈ 60 ڈالر فی بیرل تک آ گئی ہے، جس سے مہنگائی سے تنگ پاکستانی عوام کو ریلیف کی امید بندھی ہے۔

تاہم حکومتی ذرائع کا کہنا ہے کہ پیٹرول کی قیمت میں صرف 0.016 روپے فی لیٹر کمی جبکہ ہائی اسپیڈ ڈیزل کی قیمت میں 0.01 روپے فی لیٹر اضافے کا امکان ہے۔

یاد رہے کہ 15 اپریل کو بھی بین الاقوامی قیمتوں میں واضح کمی کے باوجود حکومت نے پیٹرولیم مصنوعات کی قیمتیں برقرار رکھتے ہوئے پیٹرولیم لیوی میں اضافہ کیا تھا۔ اس وقت پیٹرول 254.63 روپے اور ڈیزل 258.64 روپے فی لیٹر پر فروخت ہو رہا ہے۔

بلوچستان میں اسٹریٹجک ترقیاتی منصوبوں کیلئے حکومت نے پیٹرولیم قیمتوں سے حاصل بچت کو مخصوص کرنے کا اعلان بھی کر رکھا ہے۔