پی ایس ایل 10 کے باقی میچز یو اے ای منتقل

پاکستان کرکٹ بورڈ (پی سی بی) نے اعلان کیا ہے کہ ایچ بی ایل پاکستان سپر لیگ سیزن 10 کے باقی آٹھ میچز اب متحدہ عرب امارات (یو اے ای) میں منعقد ہوں گے۔

یہ فیصلہ چیئرمین پی سی بی محسن نقوی کی جانب سے اس وقت کیا گیا جب بھارت نے پاکستان کے مختلف بڑے شہروں، جن میں لاہور، گوجرانوالہ، راولپنڈی، اٹک، بہاولپور اور کراچی شامل ہیں، پر ڈرون حملے کیے۔

یہ میچز جو پہلے راولپنڈی، لاہور اور ملتان میں شیڈول تھے، سیکیورٹی صورتحال کے پیش نظر یو اے ای منتقل کر دیے گئے ہیں۔ پی سی بی نے بھارت کی جانب سے راولپنڈی کرکٹ اسٹیڈیم کو نشانہ بنانے کے اقدام کو "خطرناک اور غیر ذمہ دارانہ” قرار دیا ہے۔

اپنے بیان میں چیئرمین پی سی بی محسن نقوی نے کہا کہ پی سی بی ہمیشہ کھیل اور سیاست کو الگ رکھنے کا حامی رہا ہے، تاہم کھلاڑیوں اور اسٹاف کی جان و مال کی حفاظت سب سے مقدم ہے۔