ڈرگ ریگولیٹری اتھارٹی کا جعلی انجکشن پر الرٹ، فوری استعمال سے روک دیا گیا

اسلام آباد: ڈرگ ریگولیٹری اتھارٹی پاکستان (ڈریپ) نے خون کے امراض کے علاج میں استعمال ہونے والے روہپیلک انجکشن کے جعلی بیچ کی نشاندہی کرتے ہوئے ملک بھر میں اس کے استعمال اور فروخت پر فوری پابندی عائد کر دی ہے۔

تفصیلات کے مطابق جعلی روہپیلک انجکشن کا بیچ نمبر 100669751P ہے، جو مارکیٹ میں دستیاب ہے اور انتہائی مضر صحت ثابت ہو سکتا ہے۔ ڈریپ نے بتایا کہ یہ انجکشن سوئس کمپنی CSL Behring کے نام پر جعلی لیبل کے ساتھ فروخت کیا جا رہا ہے۔

ڈرگ کنٹرول ڈیپارٹمنٹ پنجاب کی رپورٹ کے مطابق انجکشن کی لیبلنگ، پتہ اور سٹیریلیٹی ٹیسٹ سب غیر معیاری پائے گئے ہیں۔

ڈریپ نے تمام فارمیسیز کو ہدایت کی ہے کہ فوری طور پر اس جعلی بیچ کی فروخت بند کریں، جب کہ ڈاکٹرز اور مریض اس مخصوص بیچ کو استعمال نہ کریں۔ نیشنل ریگولیٹری فیلڈ فورس کو مارکیٹ سرویلنس سخت کرنے اور جعلی بیچ ضبط کرنے کا حکم دے دیا گیا ہے۔