ڈپٹی وزیراعظم اسحاق ڈار اور کویتی وزیر خارجہ کے درمیان ٹیلیفونک رابطہ

ڈپٹی وزیراعظم اور وزیر خارجہ سینیٹر محمد اسحاق ڈار کو منگل کے روز کویت کے وزیر خارجہ عبداللہ علی الیحییٰ کی جانب سے ایک ٹیلیفون کال موصول ہوئی، جس میں دونوں رہنماؤں نے دو طرفہ تعلقات اور خطے کی مجموعی صورتحال پر تبادلہ خیال کیا۔

وزارت خارجہ کے ترجمان کے مطابق، اسحاق ڈار نے اپنے کویتی ہم منصب کو خطے کی تازہ صورت حال سے آگاہ کیا، خصوصاً بھارت کی بے بنیاد پروپیگنڈا مہم اور پاکستان کے خلاف یکطرفہ اور غیرقانونی اقدامات پر تشویش کا اظہار کیا۔

اس موقع پر ڈپٹی وزیراعظم نے علاقائی امن و استحکام کے لیے مشترکہ کوششوں کی ضرورت پر زور دیا۔

کویتی وزیر خارجہ نے پاکستان کے ساتھ گہرے برادرانہ تعلقات کا اعادہ کرتے ہوئے ہر ممکن حمایت کی یقین دہانی کرائی۔ انہوں نے دونوں ممالک کے درمیان دیرینہ تعلقات کو مزید فروغ دینے کی خواہش کا بھی اظہار کیا۔