سونو نگم کا کنسرٹ میدان جنگ بن گیا، بوتلیں اور پتھر برسا دیئے

بھارتی گلوکار سونو نگم کا دہلی ٹیکنالوجیکل یونیورسٹی کے سالانہ فیسٹیول ‘این جی فیسٹ 2025’ میں کنسرٹ بدنظمی کا شکار ہو گیا۔

بھارتی میڈیا کے مطابق، اتوار کی رات ہونے والا فیسٹیول اچانک ہنگامہ آرائی کا شکار ہو گیا، جب حاضرین نے اسٹیج کی جانب پتھر اور بوتلیں پھینکنا شروع کر دیں۔ اس واقعے کے نتیجے میں سونو نگم کو اپنی پرفارمنس روکنی پڑی، اور ایک لاکھ سے زائد طلبہ میں سے کچھ افراد کی ہنگامہ آرائی کی وجہ سے ٹیم کے چند اراکین زخمی ہو گئے۔

سونو نگم نے حاضرین سے امن و امان برقرار رکھنے کی اپیل کی اور کہا، "میں یہاں آپ کیلئے آیا ہوں تاکہ ہم سب اچھا وقت گزار سکیں۔ میں یہ نہیں کہہ رہا کہ آپ لطف اندوز نہ ہوں لیکن براہ کرم ایسا نہ کریں۔”

دلچسپ بات یہ ہے کہ اس دوران کسی نے اسٹیج پر ایک پنک بنی بینڈ پھینکا، جسے سونو نگم نے پہن لیا، اور اس کے بعد حاضرین نے ‘پوکی پوکی’ کے نعرے لگائے۔

واقعے کے بعد ایک طالبہ نے کہا، "یہ انتہائی شرمناک تھا کہ چند بدتمیز طلبہ کی وجہ سے ایک لیجنڈ کو اپنی پرفارمنس روک کر شائستگی کی درخواست کرنی پڑی۔” ایک اور طالب علم نے سونو نگم کے تحمل کی تعریف کرتے ہوئے کہا، "اس لمحے میں بھی وہ پرسکون اور باوقار رہے۔”

ہنگامہ آرائی کے تھمنے کے بعد سونو نگم نے دوبارہ اپنی پرفارمنس شروع کی۔ یہ پہلا موقع نہیں تھا جب سونو نگم کو کنسرٹ کے دوران بدانتظامی کا سامنا کرنا پڑا، پچھلے ماہ کولکتہ میں بھی ہجوم بے قابو ہو گیا تھا۔