کینیڈا میں کروڑوں سال پرانے عجیب و غریب سمندری شکاری کی باقیات دریافت

اوٹاوا – کینیڈا میں سائنسدانوں نے ایک عجیب و غریب سمندری شکاری جانور کی باقیات دریافت کی ہیں جو کروڑوں سال قبل زمین پر موجود تھا۔ اس دریافت کا اعلان ایک حالیہ سائنسی تحقیق میں کیا گیا ہے، جس میں اس قدیم جاندار کو ایلاسموسورس کی ایک نئی نسل کے طور پر شناخت کیا گیا ہے۔

تحقیق جرنل آف سیسٹیمیٹک پیلیونٹولوجی میں شائع ہوئی ہے، جس کے مطابق اس جاندار کو "ٹراسکاسورا سینڈرے” (Tlatolophus galorum) کا نام دیا گیا ہے۔ یہ ایک نایاب سمندری مخلوق تھی جو تقریباً 85 ملین سال پہلے سمندری ماحول میں پائی جاتی تھی۔

ایلاسموسورز وہ سمندری رینگنے والے جانور تھے جن کی گردنیں سانپ جیسی لمبی، جبڑے بڑے اور دانت تیز ہوتے تھے، جو انہیں مؤثر شکاری بناتے تھے۔ یہ جانور شکار کو پکڑنے، کچلنے اور نگلنے کی خاص صلاحیت رکھتے تھے۔

نئی دریافت شدہ نسل، ٹراسکاسورا، اپنی جسمانی ساخت اور کچھ منفرد جینیاتی خصوصیات کی بنیاد پر دیگر ایلاسموسورز سے مختلف بتائی گئی ہے۔ محققین کے مطابق، اس مخلوق میں "ابتدائی اور اخذ کردہ خصائص” کی ایک نایاب امتزاج پایا گیا ہے، جو اسے ایک دلچسپ اور اہم دریافت بناتا ہے۔

یہ دریافت اس بڑے گروہ پلیسیوسارس کی مزید تفہیم میں مدد دے گی، جو تقریباً 215 ملین سے 66 ملین سال پہلے زمین کے سمندروں میں پائے جاتے تھے۔ یہ دریافت نہ صرف زمین کی حیاتیاتی تاریخ کے ایک اہم باب کو روشن کرتی ہے بلکہ ماہرینِ ارضیات اور حیاتیات کے لیے تحقیق کے نئے در بھی کھولتی ہے۔