اسرائیل کا سعودی وزیر خارجہ سمیت عرب وزرائے خارجہ کو رام اللہ جانے سے روکنے کا فیصلہ

مقبوضہ بیت المقدس: اسرائیل نے سعودی عرب، متحدہ عرب امارات، مصر، اردن، قطر اور ترکیہ کے وزرائے خارجہ کو مقبوضہ مغربی کنارے کے شہر رام اللہ جانے کی اجازت نہ دینے کا فیصلہ کر لیا ہے۔

ذرائع کے مطابق سعودی وزیر خارجہ شہزادہ فیصل بن فرحان کی قیادت میں ایک اعلیٰ سطحی عرب وزارتی وفد اتوار کے روز فلسطینی صدر محمود عباس سے ملاقات کے لیے رام اللہ کا دورہ کرنے والا تھا۔ یہ دورہ اس لحاظ سے تاریخی قرار دیا جا رہا ہے کہ 1967 میں اسرائیلی قبضے کے بعد کسی سعودی وزیر خارجہ کا مغربی کنارے کا یہ پہلا متوقع دورہ تھا۔

اسرائیلی میڈیا کے مطابق، اسرائیل اس دورے کی اجازت نہیں دے گا کیونکہ فلسطینی اتھارٹی عرب وزرائے خارجہ کی میزبانی کے ذریعے فلسطینی ریاست کے قیام کی عالمی حمایت حاصل کرنا چاہتی ہے۔ اسرائیلی حکام نے واضح کیا ہے کہ وہ کسی بھی فلسطینی ریاست کو قبول کرنے کے لیے تیار نہیں۔

یہ پیشرفت ایسے وقت میں سامنے آئی ہے جب اسرائیل نے حال ہی میں مغربی کنارے کو "یہودی ریاست” بنانے کے ارادے کا اظہار کیا ہے۔