امریکا-چین تجارتی جنگ: ایپل کا بھارت کو مینوفیکچرنگ مرکز بنانے کا فیصلہ

نیویارک/نئی دہلی: امریکا اور چین کے درمیان جاری تجارتی کشیدگی کے باعث ایپل نے 2026 کے اختتام تک امریکا میں فروخت ہونے والے تمام آئی فونز بھارت میں تیار کرنے کا فیصلہ کر لیا ہے۔

ایپل کے زیادہ تر فونز اس وقت چین میں تیار کیے جاتے ہیں، لیکن بڑھتے ہوئے ٹیرف اور درآمدی محصولات کے باعث کمپنی نے چین پر انحصار کم کرنے کا فیصلہ کیا ہے۔

ایپل کی شراکت دار کمپنیاں فاکسکون اور ٹاٹا الیکٹرانکس پہلے ہی بھارت میں آئی فونز کی تیاری میں مصروف ہیں، اور مارچ 2025 تک تقریباً 2 ارب ڈالر کے فون امریکا کو برآمد کیے جا چکے ہیں۔

کمپنی کا ہدف ہے کہ 2026 تک بھارت میں سالانہ 60 لاکھ آئی فونز تیار کیے جائیں۔ یہ اقدام ایپل کی سپلائی چین کو متنوع بنانے کے ساتھ ساتھ بھارت کی معیشت کے لیے بھی ایک بڑی کامیابی قرار دیا جا رہا ہے۔

واضح رہے، ایپل نے 2017 میں بھارت میں آئی فونز کی تیاری کا آغاز کیا تھا، اور اب بھارت کو اپنا نیا مینوفیکچرنگ ہب بنانے کی جانب بڑھ رہی ہے۔