بھارت نے ایشیا کپ سے دستبرداری کی خبروں کی تردید کر دی

بھارت نے پاکستان سے کشیدگی کے باعث ایشیا کپ اور ویمنز ایمرجنگ ایشیا کپ میں شرکت نہ کرنے کی خبروں کی تردید کر دی۔

بھارتی کرکٹ بورڈ (بی سی سی آئی) کے سیکرٹری دیو اجیت سائکیا نے ان رپورٹس کی تردید کرتے ہوئے کہا ہے کہ "ایشین کرکٹ کونسل (اے سی سی) کے ایونٹس سے متعلق ابھی تک کوئی فیصلہ نہیں ہوا۔”

ان کا کہنا تھا کہ ہماری توجہ اس وقت صرف آئی پی ایل اور انگلینڈ کے خلاف سیریز پر ہے، اور بھارتی میڈیا میں چلنے والی خبریں بے بنیاد اور افواہ پر مبنی ہیں۔ اگر کسی ایونٹ سے متعلق کوئی فیصلہ کیا گیا، تو باقاعدہ اعلان کیا جائے گا۔

واضح رہے کہ بھارتی میڈیا نے نامعلوم ذرائع کے حوالے سے دعویٰ کیا تھا کہ بھارت ایشیا کپ اور ویمنز ایمرجنگ ایشیا کپ سے دستبردار ہو چکا ہے۔