ای او بی آئی پنشن میں اضافہ، لاکھوں پنشنرز کے چہروں پر خوشی

ای او بی آئی (ایمپلوائز اولڈ ایج بینیفٹس انسٹی ٹیوشن) کے پنشنرز کے لیے ایک مثبت پیش رفت سامنے آئی ہے، جہاں کم از کم پنشن میں اضافے کا فیصلہ کر لیا گیا ہے۔ پنشن میں یہ اضافہ یکم جنوری 2025 سے نافذ العمل ہوگا، جبکہ اس کا باضابطہ اعلان یومِ مزدور (1 مئی) کو کیے جانے کا امکان ہے۔

گزشتہ روز قومی اسمبلی کی پبلک اکاؤنٹس کمیٹی کا اجلاس چیئرمین جنید اکبر کی زیر صدارت منعقد ہوا، جس میں وزارت اوورسیز پاکستانی اور ہیومن ریسورس ڈویلپمنٹ کے مالی سال 2022-23 کے آڈٹ پیراز کا تفصیلی جائزہ لیا گیا۔

اجلاس میں ای او بی آئی حکام نے بتایا کہ بورڈ آف ٹرسٹیز نے کم از کم پنشن کو 10 ہزار سے بڑھا کر 11 ہزار 500 روپے کرنے کی منظوری دے دی ہے۔ اس کے ساتھ ساتھ 10 ہزار روپے سے زیادہ پنشن لینے والوں کے لیے 15 فیصد اضافے کا فیصلہ بھی کیا گیا ہے، جس سے تقریباً پانچ لاکھ پنشنرز مستفید ہوں گے۔

اجلاس میں حکام نے انکشاف کیا کہ ای او بی آئی نے گزشتہ عرصے میں 2 ارب 79 کروڑ روپے کی ادائیگیاں جعلی پنشنرز کو کیں۔ آڈٹ پیراز میں یہ الزام سامنے آیا کہ بعض افراد کو ملازمین کی عمر میں تبدیلی کر کے غیر قانونی طور پر پنشن دی گئی۔ یہ بھی بتایا گیا کہ ای او بی آئی کے پاس اس وقت 600 ارب روپے کا فنڈ موجود ہے۔

ای او بی آئی حکام کا کہنا تھا کہ ادارہ 1976 میں قائم ہوا، نادرا سے بھی پہلے، اور شناختی کارڈ کے علاوہ دیگر ذرائع سے بھی عمر کی تصدیق کی جاتی ہے۔ مزید یہ کہ ادارے میں صرف 38 فیصد منظور شدہ عملہ تعینات ہے، تاہم بھرتیوں کا عمل تیز کر دیا گیا ہے اور جلد نئے افسران کی شمولیت متوقع ہے۔