بانی پی ٹی آئی کا چیف جسٹس کو خط، بڑا مطالبہ کر دیا

اسلام آباد: بانی پی ٹی آئی کا خط چیف جسٹس یحییٰ آفریدی کے چیمبر میں پہنچا دیا گیا ہے، جس میں آئین اور بنیادی حقوق کی خلاف ورزیوں پر نوٹس لینے کی درخواست کی گئی ہے۔

خط سلمان اکرم راجہ نے چیف جسٹس کے چیمبر میں پہنچایا۔ یہ خط چیف جسٹس یحییٰ آفریدی اور قائم مقام چیف جسٹس کے نام لکھا گیا ہے۔ خط میں درخواست کی گئی ہے کہ آئین اور حقوق کی خلاف ورزیوں پر فوری طور پر نوٹس لیا جائے۔

عمران خان کی بہن، علیمہ خانم نے اسلام آباد ہائیکورٹ کے باہر میڈیا سے گفتگو کرتے ہوئے کہا کہ وہ پریشانی میں مبتلا ہیں کیونکہ گزشتہ 5 ماہ سے بانی پی ٹی آئی سے ملاقات کی اجازت نہیں دی جا رہی۔ علیمہ خانم کا کہنا تھا کہ چیف جسٹس سے ملاقات کا مقصد عدلیہ کے تقدس کی بحالی تھا، اور انہوں نے درخواست کی کہ عدالت کو ڈیجیٹلائز کیا جائے۔

دوسری جانب چیئرمین پی ٹی آئی بیرسٹر گوہر نے بتایا کہ قائم مقام چیف جسٹس اسلام آباد ہائیکورٹ سردار سرفراز ڈوگر سے ملاقات ہوئی، جس میں انہوں نے تمام اہم امور اور فیملی ملاقاتوں کی تفصیل پیش کی۔ بیرسٹر گوہر نے امید ظاہر کی کہ چیف جسٹس سے ملاقات کے بعد منگل کو بانی پی ٹی آئی سے فیملی اور وکلاء کی ملاقات ممکن ہو سکے گی۔