برطانیہ جانے کے خواہشمند پاکستانی طلبہ کیلئے اہم خبر

لندن: برطانیہ جانے کے خواہشمند پاکستانی طلبا کیلئے اہم خبر سامنے آئی ہے — برطانوی حکومت گریجویٹ ویزا اسکیم میں سخت تبدیلیوں پر غور کر رہی ہے، جس کا مقصد نیٹ مائیگریشن میں کمی لانا ہے۔

فنانشل ٹائمز کے مطابق، مجوزہ اصلاحات کے تحت غیر ملکی طلبا کو تعلیم مکمل کرنے کے بعد برطانیہ میں قیام کیلئے گریجویٹ سطح کی ملازمت حاصل کرنا لازمی ہوگا۔

موجودہ اسکیم کے تحت طلبا گریجویشن کے بعد 2 سال برطانیہ میں رہ سکتے ہیں۔

60 فیصد طلبا ایک سال بعد بھی £30,000 سے کم کما رہے ہیں، جو اوسط تنخواہ سے کم ہے۔

ہوم آفس کا مؤقف ہے کہ 40 فیصد سیاسی پناہ کے دعوے سابق طالب علم ویزا ہولڈرز کی جانب سے کیے گئے۔ ہوم آفس اور محکمہ تعلیم کے درمیان اس معاملے پر اختلاف ہے۔ محکمہ تعلیم کا کہنا ہے کہ یہ تبدیلیاں برطانوی یونیورسٹیوں پر مالی دباؤ ڈال سکتی ہیں۔

یونیورسٹیز یو کے کی چیف ایگزیکٹیو ویوین اسٹرن کے مطابق، بین الاقوامی طلبا ہر سال £40 ارب کی معاشی مدد فراہم کرتے ہیں، اور دو سالہ ویزا ان کیلئے عملی تجربے کا اہم موقع ہے۔

لیبر حکومت آئندہ ماہ مائیگریشن پالیسی پر وائٹ پیپر جاری کرے گی، جس میں گریجویٹ ویزا اسکیم میں مجوزہ اصلاحات شامل ہوں گی۔ سخت شرائط متعارف کرائے جانے کا امکان ہے، جو سابقہ حکومت سے مختلف ہوں گی۔