بھارتی ڈرون حملے، عمران خان کی جان کو خطرہ: علی امین گنڈا پور کی درخواست

اسلام آباد: خیبرپختونخوا کے وزیراعلیٰ علی امین گنڈا پور نے جمعہ کے روز اسلام آباد ہائی کورٹ (آئی ایچ سی) میں ایک آئینی درخواست دائر کی ہے، جس میں پاکستان تحریک انصاف (پی ٹی آئی) کے بانی اور سابق وزیراعظم عمران خان کی تمام مقدمات میں پیرول پر رہائی کی استدعا کی گئی ہے۔

یہ درخواست علی امین گنڈا پور نے اپنے وکلاء لطیف کھوسہ اور شہباز کھوسہ کے ذریعے دائر کی، جس میں مؤقف اختیار کیا گیا ہے کہ ملک کی موجودہ قومی سلامتی کی صورتحال غیر معمولی اقدامات کی متقاضی ہے۔

گنڈا پور نے درخواست میں بھارت کی مودی سرکار کی جانب سے پاکستان کے مختلف شہروں پر ڈرون حملوں سمیت غیر اعلانیہ جارحیت کا حوالہ دیتے ہوئے کہا کہ ان حالات میں عمران خان کی زندگی کو شدید خطرات لاحق ہیں۔

انہوں نے درخواست میں مؤقف اپنایا کہ عمران خان کے دور حکومت میں پاکستان اور بھارت کے تعلقات کشیدہ رہے اور خان نے مودی حکومت کی پالیسیوں کو کھل کر چیلنج کیا۔ گنڈا پور کا کہنا تھا کہ عمران خان نے قومی اور بین الاقوامی سطح پر مودی کو بارہا شرمندہ کیا، جس کی وجہ سے وہ بھارت کے لیے ایک بڑی رکاوٹ بنے۔