بینظیر بھٹو کی 72ویں سالگرہ آج منائی جا رہی ہے

آج پاکستان کی پہلی خاتون وزیرِاعظم بینظیر بھٹو کی 72ویں سالگرہ منائی جا رہی ہے۔ ملک بھر میں مختلف مقامات پر کیک کاٹنے کی تقریبات منعقد کی جا رہی ہیں تاکہ ان کی زندگی، جمہوریت کے لیے ان کی خدمات اور ان کی قربانی کو خراجِ تحسین پیش کیا جا سکے۔

بینظیر بھٹو 21 جون 1953 کو کراچی میں پیدا ہوئیں۔ وہ سابق وزیرِاعظم ذوالفقار علی بھٹو کی بیٹی تھیں، جو انہیں پیار سے "پنکی” کہہ کر بلاتے تھے۔ بینظیر نے ہارورڈ اور آکسفورڈ یونیورسٹیوں سے تعلیم حاصل کی اور کئی اہم دوروں پر اپنے والد کے ساتھ بیرونِ ملک گئیں۔

اپنے والد کی گرفتاری اور 1979 میں پھانسی کے بعد، بینظیر اور ان کی والدہ نصرت بھٹو نے پاکستان پیپلز پارٹی (PPP) کی قیادت سنبھالی۔ انہوں نے ضیاء الحق کی آمریت کے خلاف جدوجہد کی اور کئی سال جلاوطنی میں گزارے۔ 1986 میں جب وہ لاہور واپس آئیں تو لاکھوں افراد نے ان کا شاندار استقبال کیا۔

1987 میں بینظیر کی شادی آصف علی زرداری سے ہوئی۔ 1988 کے عام انتخابات میں کامیابی کے بعد وہ ایشیا کی پہلی خاتون وزیرِاعظم بنیں۔ ان کی حکومت 1990 میں ختم کر دی گئی، لیکن وہ 1993 میں دوبارہ وزیرِاعظم بنیں۔ ان کی دوسری حکومت بھی 1996 میں ختم کر دی گئی۔

بینظیر بھٹو 2007 میں دوبارہ پاکستان واپس آئیں اور انتخابی مہم شروع کی۔ بدقسمتی سے 27 دسمبر 2007 کو راولپنڈی میں جلسے کے بعد دہشت گرد حملے میں شہید ہو گئیں۔ بینظیر بھٹو کو "دخترِ مشرق” اور "شہیدِ جمہوریت” کے طور پر یاد کیا جاتا ہے اور وہ ہمیشہ پاکستان اور دنیا بھر میں عزت کے ساتھ یاد رکھی جائیں گی۔