تحریک انصاف کی خواتین کا بانی کی رہائی کیلئے بڑا فیصلہ

پاکستان تحریک انصاف (پی ٹی آئی) کی خواتین نے پارٹی کے بانی کی رہائی کیلئے عید الفطر کے بعد اپنی جدوجہد تیز کرنے کا فیصلہ کیا ہے۔

ویمن ونگ کے اجلاس میں عید کے بعد بانی پی ٹی آئی کی رہائی کیلئے مظاہروں کا فیصلہ کیا گیا۔ اجلاس کی صدارت پی ٹی آئی ویمن ونگ کی جنرل سیکرٹری روبینہ شاہین نے کی۔

اجلاس میں فیصلہ کیا گیا کہ عید کے بعد بانی پی ٹی آئی کی رہائی کیلئے تحریک کو مزید تیز کیا جائے گا۔ اجلاس میں پی ٹی آئی کی جنرل سیکرٹری ویمن ونگ لاہور ثمینہ خاور حیات اور مرکزی ڈپٹی جنرل سیکرٹری عمارہ اظہر نے بھی شرکت کی۔

روبینہ شاہین نے کہا کہ بانی پی ٹی آئی کو سیاسی انتقام کا نشانہ بنایا جا رہا ہے، اور اس کے خلاف ہم اپنی جدوجہد تیز کریں گے۔ ثمینہ خاور حیات نے کہا کہ بانی پی ٹی آئی کی مقبولیت نے حکمرانوں کے ہوش اڑا دیے ہیں۔