تیس سے زائد ممالک میں عید الفطر کی پیشگوئی

مصر کے نیشنل انسٹی ٹیوٹ فار ایسٹرانومیکل اینڈ جیو فزیکل ریسرچ نے سال 1446 ہجری کیلئے شوال کے چاند کے مشاہدے کی پیش گوئی کی ہے اور 2025 میں عید الفطر کی تاریخ واضح کی ہے۔

ادارے نے بتایا کہ شوال کا چاند 29 مارچ 2025 کو قاہرہ کے مقامی وقت کے مطابق دوپہر 1 بجے کے بعد پیدا ہوگا۔ یہ چاند غروب آفتاب کے بعد 11 منٹ تک قاہرہ میں نظر آئے گا، جبکہ مصر کے دیگر علاقوں میں 9 سے 12 منٹ تک آسمان پر رہے گا۔

انسٹی ٹیوٹ نے بتایا کہ عرب اور اسلامی دارالحکومتوں میں بھی شوال کا چاند غروب آفتاب کے بعد 3 سے 19 منٹ تک دکھائی دے گا۔ تاہم، کوالالمپور (ملائیشیا) میں چاند غروب آفتاب سے 5 منٹ پہلے اور جکارتہ (انڈونیشیا) میں 7 منٹ پہلے غروب ہو جائے گا۔

انسٹی ٹیوٹ نے ان شہروں کی فہرست بھی جاری کی ہے جہاں 29 مارچ 2025 کو شوال کا چاند دیکھا جا سکتا ہے، جن میں قاہرہ، اسکندریہ، سوہاج، مکہ مکرمہ، مدینہ منورہ، بغداد، ریاض، دبئی، کوالا لمپور، جکارتہ، لندن، واشنگٹن اور ماسکو سمیت 30 سے زائد شہروں کے نام شامل ہیں۔ ادارے نے وضاحت کی کہ 30 مارچ 2025 کو ان علاقوں میں عید الفطر منائی جا سکتی ہے۔