ریکوڈک منصوبہ: آئی ایف سی کا پاکستان کو 400 ملین ڈالر کا اضافی قرض

اسلام آباد — انٹرنیشنل فنانس کارپوریشن  نے پاکستان کے ریکوڈک تانبہ اور سونے کے منصوبے کے لیے 400 ملین ڈالر کا سب آرڈی نیٹڈ قرضہ فراہم کرنے کا اعلان کیا ہے۔ یہ نئی رقم اپریل میں دیے گئے 300 ملین ڈالر کے بعد دی جا رہی ہے، جس سے آئی ایف سی کی مجموعی فنانسنگ 700 ملین ڈالر تک پہنچ گئی ہے۔

بلوچستان میں واقع ریکوڈک منصوبہ دنیا کے بڑے غیر ترقی یافتہ تانبہ اور سونے کے ذخائر میں سے ایک ہے۔ اس منصوبے کی تخمینہ لاگت 6.6 ارب ڈالر ہے، جسے بین الاقوامی اور علاقائی مالیاتی اداروں کے کنسورشیم کے ذریعے قرض اور سرمایہ کاری کے امتزاج سے مکمل کیا جائے گا۔

آئی ایف سی کی جانب سے جاری بیان میں کہا گیا:

"منصوبے کی کل تخمینہ لاگت 6.6 ارب ڈالر ہے، جسے قرض اور ایکویٹی کے امتزاج سے فنانس کیا جائے گا۔”

یہ قرض سب آرڈی نیٹڈ قرض کہلاتا ہے، جو عموماً دیگر بڑے قرضوں کے بعد ادا کیا جاتا ہے اور سرمایہ کاروں کے لیے خطرہ کم کرنے کا ذریعہ بنتا ہے، تاکہ وہ منصوبے میں شراکت داری کرنے میں زیادہ پراعتماد ہوں۔

اس مالیاتی پیکیج میں دیگر بڑے اداروں کی شرکت بھی متوقع ہے، جن میں شامل ہیں:

• امریکی EXIM بینک

• ایشین ڈویلپمنٹ بینک (ADB)

• ایکسپورٹ ڈیولپمنٹ کینیڈا (EDC)

• جاپان کا JBIC (جاپان بینک فار انٹرنیشنل کوآپریشن)

منصوبہ ڈائریکٹر ٹم کریب نے اپریل میں رائٹرز کو بتایا تھا کہ فنانسنگ کے حتمی معاہدے کی شرائط پر کام جاری ہے، اور یہ تیسرے سہ ماہی کے آغاز تک مکمل ہو جائیں گے۔