سرکاری افسران کے لیے خوشخبری!

اعلیٰ اختیاراتی سلیکشن بورڈ کا اجلاس رواں ہفتے متوقع ہے جس میں متعدد سرکاری افسران کو گریڈ 22 میں ترقی دیے جانے کا امکان ہے۔

تفصیلات کے مطابق وزیراعظم کی زیرصدارت اجلاس آج یا کل ہونے کا امکان ہے۔ ذرائع نے تصدیق کی ہے کہ اسٹیبلشمنٹ ڈویژن نے اجلاس کی تیاریاں مکمل کر لی ہیں جس کے دوران گریڈ 21 سے گریڈ 22 میں 40 سے زائد عہدوں پر ترقیوں کا جائزہ لیا جائے گا۔

ذرائع کا کہنا ہے کہ آئی جی سندھ غلام نبی میمن کی گریڈ 22 میں ترقی کا کیس زیر غور آئے گا جب کہ وزیراعظم کے سیکرٹری اسد الرحمان گیلانی کا کیس بھی گریڈ 22 میں ترقی کیلئے پیش کیا جائے گا۔

یہ بھی توقع ہے کہ ایف بی آر کے چیئرمین راشد محمود اور سیکرٹری تعلیم و تربیت محی الدین احمد وانی کو گریڈ 22 میں ترقی دینے پر غور کیا جائے گا۔

مزید برآں، ایڈیشنل سیکرٹری انچارج پٹرولیم ڈویژن مومن آغا، چیف سیکرٹری پنجاب زیدہ اختر زمان، ارم بخاری، ساجد بلوچ، جودھت ایاز اور ندیم محبوب سمیت کئی دیگر افسران کی گریڈ 22 میں ترقیاں زیر غور ہیں۔

زیر غور دیگر ناموں میں عنبرین رضا، عثمان اختر باجوہ، مصدق احمد خان، عطاء الرحمان، پولیس سروس کے افسران محمد فاروق مظہر، آصف سیف اللہ پراچا، احمد مکرم، عامر ذوالفقار خان، اور عمران یعقوب منہاس کے علاوہ وسیم اجمل چوہدری، داؤد احمد، منیجو اور شاہ سلمان شامل ہیں۔

اعلیٰ اختیاراتی سلیکشن بورڈ کا آخری اجلاس مارچ 2023 میں ہوا تھا۔ تاخیر کی وجہ سے کئی افسران بغیر ترقی کے ریٹائر ہو گئے۔