ٹرمپ کی سفری پابندیوں کے باعث پاکستان، افغانستان باشندوں کا امریکا میں داخلہ بند ہونے کا خدشہ

امریکی صدر ڈونلڈ ٹرمپ کی جانب سے نئی سفری پابندیوں کے باعث پاکستان اور افغانستان کے باشندوں کا آئندہ ہفتے سے امریکا میں داخلہ بند ہونے کا خدشہ پیدا ہو گیا۔

امریکی انتظامیہ مختلف ملکوں میں سکیورٹی اور جانچ پڑتال کے نظام کا جائزہ لے رہی ہے، اس نظرِ ثانی کے نتیجے میں مختلف ملکوں سے آنے والوں کا امریکا میں داخلہ بند ہو سکتا ہے۔

صدر ٹرمپ نے 20 جنوری کو ایک ایگزیکٹو آرڈر جاری کیا تھا جس کے تحت امریکی سلامتی کو خطرات کی نشاندہی کیلئے امریکا آنے والوں کی سخت جانچ پڑتال کو ضروری قرار دیا گیا تھا۔ ٹرمپ نے کابینہ اراکین کو ہدایت کی تھی کہ کمزور اور ناقص جانچ پڑتال والے ممالک کی فہرست فراہم کی جائے۔ جن پر جزوی یا مکمل پابندی کا اطلاق کیا جانا چاہیے۔

غیر ملکی میڈیا کے مطابق افغانستان اور پاکستان پر مکمل سفری پابندی کی تجویز دی جا سکتی ہے جبکہ نئی پابندیوں سے وہ ہزاروں افغان بھی متاثر ہو سکتے ہیں جنہیں امریکا میں بسانے کیلئے کلیئرنس مل چکی ہے۔