سلمان خان کا لارنس بشنوئی کی دھمکیوں پر ردعمل

بالی ووڈ کے معروف اداکار سلمان خان نے گینگسٹر لارنس بشنوئی کی جانب سے ملنے والی جان سے مارنے کی دھمکیوں پر اپنا ردعمل دے دیا ہے۔

بھارتی میڈیا کے مطابق، سلمان خان نے اپنی فلم سکندر کی تشہیری مہم کے دوران اس معاملے پر کھل کر بات کی۔ سلمان خان سے سکیورٹی اور اپنی جان کو لاحق خطرات کے بارے میں سوال کیا گیا تو انہوں نے کہا: "جتنی عمر لکھی ہے، اتنی ہی رہے گی، میں خدا کی رضا پر یقین رکھتا ہوں، موت و زندگی کا فیصلہ اسی کے ہاتھ میں ہے۔”

سلمان خان نے سیکیورٹی کے مسائل پر بھی بات کی اور کہا کہ کبھی کبھار اتنے زیادہ محافظوں کے ساتھ چلنا مشکل ہوتا ہے، "ہر جگہ اتنے لوگ ہوں تو یہ خود ایک بڑی پریشانی بن جاتی ہے۔”

یاد رہے کہ سلمان خان کو طویل عرصے سے لارنس بشنوئی کی جانب سے دھمکیاں مل رہی ہیں، جس کے بعد حکومت نے انہیں وائی+ سیکیورٹی فراہم کی ہے۔ اس سیکیورٹی کے تحت 12 پولیس اہلکار اور 2 سے 4 کمانڈوز ہمہ وقت ان کے ساتھ رہتے ہیں۔ اس کے علاوہ ان کی ذاتی سیکیورٹی ٹیم میں مشہور گارڈ ‘شیرا’ کے ساتھ تقریباً 40 باؤنسرز اور پرائیویٹ گارڈز بھی شامل ہیں۔