سندھ حکومت نے ٹرانسپورٹ افسران کی چھٹیاں منسوخ کردیں

کراچی – سندھ حکومت نے عیدالاضحی کے موقع پر شہریوں سے اضافی کرایہ وصول کرنے کی شکایات کو روکنے کے لیے اہم قدم اٹھاتے ہوئے صوبائی، علاقائی اور ضلعی ٹرانسپورٹ اتھارٹیز کے تمام افسران کی چھٹیاں منسوخ کر دی ہیں۔

یہ فیصلہ اس لیے کیا گیا ہے تاکہ تمام متعلقہ افسران عید کے دنوں میں ڈیوٹی پر موجود رہیں اور کرایوں میں کسی بھی قسم کے غیر قانونی اضافے پر فوری کارروائی کر سکیں۔

سینیئر وزیر شرجیل انعام میمن نے واضح کیا کہ عید کے دوران مسافروں سے صرف حکومت کی جانب سے مقرر کردہ کرایہ ہی وصول کیا جائے گا۔ انہوں نے کہا کہ یہ وہ موقع ہوتا ہے جب لوگ اپنے پیاروں سے ملنے کے لیے سفر کرتے ہیں، اور حکومت کی ذمہ داری ہے کہ انہیں سہولت فراہم کی جائے۔

اگر فیلڈ افسران بروقت جواب نہ دے سکیں تو شہری براہِ راست ڈپٹی سیکریٹری ٹرانسپورٹ سے 0346-2522641 پر رابطہ کر سکتے ہیں۔

شرجیل میمن نے خبردار کیا کہ جو بھی ٹرانسپورٹر سرکاری کرایوں سے زیادہ رقم وصول کرتا پایا گیا، اس کے خلاف سخت کارروائی کی جائے گی۔

انہوں نے عوام سے اپیل کی کہ وہ صرف سرکاری کرایہ ادا کریں، کسی بھی خلاف ورزی کی صورت میں شکایت درج کرائیں اور اپنے حقوق سے آگاہ رہیں۔

سندھ حکومت نے عزم ظاہر کیا ہے کہ عیدالاضحی کے موقع پر عوام کو ہر ممکن سہولت دی جائے گی اور ٹرانسپورٹ کے نظام کو شفاف رکھا جائے گا۔