سگے کزنز اور قریبی رشتہ داروں کی شادیوں پر پابندی عائد

آذربائیجان نے اپنے فیملی کوڈ میں ایک اہم ترمیم کرتے ہوئے ایسے افراد کے درمیان شادیوں پر پابندی لگا دی ہے جو ایک ہی حیاتیاتی دادا، دادی، نانا یا نانی کے پوتے پوتیاں یا نواسے نواسیاں ہوں۔
یعنی اب سگے کزنز، چچا اور بھتیجی، خالہ اور بھانجا جیسے قریبی رشتہ دار آپس میں شادی نہیں کر سکیں گے۔

یہ ترمیم اُن موجودہ قوانین میں وسعت ہے جن کے تحت پہلے ہی والدین اور اولاد، گود لینے والے والدین اور گود لیے گئے بچے، یا قانونی طور پر نااہل افراد کے درمیان شادی پر پابندی عائد تھی۔

آذربائیجان کے حکام کے مطابق اس اقدام کا بنیادی مقصد نسلی بیماریوں (جینیاتی ڈس آرڈرز) سے بچاؤ اور خاندانی نظام کو عالمی صحت و قانون کے معیارات کے مطابق ہم آہنگ کرنا ہے۔

صحت اور سماجی امور سے وابستہ ماہرین نے اس ترمیم کو سراہتے ہوئے کہا ہے کہ یہ فیصلہ نسل کی بہتری اور عوامی صحت کے تحفظ کی جانب اہم قدم ہے۔ قانونی ماہرین کے مطابق یہ اقدام ملک کے خاندانی قوانین کو مزید جدید اور مؤثر بنانے میں مدد دے گا۔