غزہ میں آئندہ ہفتے تک جنگ بندی کا امکان: ڈونلڈ ٹرمپ

واشنگٹن — امریکی صدر ڈونلڈ ٹرمپ نے دعویٰ کیا ہے کہ غزہ میں جاری کشیدگی کو ختم کرنے کے لیے آئندہ ہفتے تک جنگ بندی نافذ ہو سکتی ہے۔ ان کا کہنا تھا کہ وہ اس حوالے سے کافی پُرامید ہیں اور امن کی کوششیں جاری ہیں۔

وائٹ ہاؤس میں میڈیا سے گفتگو کرتے ہوئے ٹرمپ نے کہا کہ "مجھے یقین ہے کہ غزہ میں جنگ بندی کے امکانات روشن ہیں، اور اگلے چند دنوں میں بڑی پیش رفت متوقع ہے۔”

انہوں نے ایران کے حوالے سے بھی چونکا دینے والے انکشافات کیے۔ ٹرمپ کا کہنا تھا کہ انہوں نے ایرانی سپریم لیڈر آیت اللہ علی خامنہ ای کو ایک بڑے حملے سے بچایا۔ ان کا کہنا تھا کہ انہوں نے اسرائیل اور امریکی فورسز کو تہران پر حملہ کرنے سے روک دیا، جو کہ ایران کے لیے ایک تباہ کن حملہ ثابت ہوتا۔

ٹرمپ کے مطابق، "اگر حملہ ہوتا تو ہزاروں افراد ہلاک ہوتے اور ایران کی حالت مزید خراب ہو جاتی۔” انہوں نے دعویٰ کیا کہ ایران کی تین اہم جوہری تنصیبات مکمل طور پر تباہ کردی گئی ہیں۔

ٹرمپ نے ایرانی قیادت کو تنقید کا نشانہ بناتے ہوئے کہا کہ ایران نے شکر گزاری کے بجائے نفرت انگیز رویہ اختیار کیا۔ ان کا کہنا تھا کہ ایران اگر عالمی قوانین اور اصولوں کا احترام نہیں کرتا تو اس کی مشکلات میں مزید اضافہ ہو گا۔

انہوں نے مزید کہا کہ ایران کی جوہری تنصیبات امریکی بمباری سے پہلے خالی نہیں کروائی گئیں، جس کے باعث نقصان زیادہ ہوا۔ ٹرمپ کا یہ بھی کہنا تھا کہ انہیں نہیں لگتا کہ ایران جلد جوہری پروگرام کی طرف دوبارہ جائے گا۔

امریکی معیشت پر بات کرتے ہوئے ٹرمپ نے کہا کہ امریکا نے محصولات (ٹیرف) کی مد میں 88 ارب ڈالر حاصل کیے ہیں، اور وہ ان ممالک پر مزید معاشی دباؤ ڈالیں گے جو امریکا کے ساتھ تجارتی معاہدے نہیں کرتے۔