فیصل آباد میں اربوں روپے کا آن لائن فراڈ بے نقاب، 149 افراد گرفتار

فیصل آباد: نیشنل سائبر کرائم انویسٹی گیشن ایجنسی  نے بڑی کارروائی کرتے ہوئے اربوں روپے کے آن لائن مالیاتی فراڈ میں ملوث نیٹ ورک کو بے نقاب کر دیا۔

ترجمان کے مطابق کارروائی سابق چیئرمین فیسکو کی رہائش گاہ پر کی گئی، جہاں ایک غیر قانونی کال سینٹر قائم تھا۔ وہاں سے شہریوں کو جھانسہ دے کر بھاری رقوم بٹوری جا رہی تھیں۔

کارروائی کے دوران 149 افراد کو گرفتار کیا گیا، جن میں 131 مرد اور 18 خواتین شامل ہیں۔ ملزمان پونزی اسکیم کے تحت لوگوں کو سرمایہ کاری پر منافع کا لالچ دے کر فراڈ کرتے تھے۔

ایجنسی کے مطابق ملزمان مختلف مالیاتی جرائم اور دھوکہ دہی میں ملوث تھے، مزید تحقیقات جاری ہیں۔