قومی اسمبلی نے بھارتی جارحیت کیخلاف متفقہ قرارداد منظور کرلی

اسلام آباد: قومی اسمبلی نے بھارتی جارحیت اور فالس فلیگ آپریشن کی مذمت میں متفقہ قرارداد منظور کرلی، جس میں خبردار کیا گیا کہ اگر بھارت نے پاکستان کا پانی روکا تو اسے جنگ تصور کیا جائے گا۔

اسپیکر ایاز صادق کی زیر صدارت اجلاس میں معمول کی کارروائی معطل کر کے پاک بھارت کشیدگی پر بحث کی گئی۔ وزیر پارلیمانی امور طارق فضل چوہدری کی پیش کردہ قرارداد میں کہا گیا کہ پاکستان ہر قسم کی دہشتگردی کی مذمت کرتا ہے، اور کشمیری عوام اپنے حقِ خودارادیت کیلئے جدوجہد کر رہے ہیں۔

اپوزیشن لیڈر عمر ایوب نے حکومت کے مؤقف کی تائید کرتے ہوئے کہا کہ بھارت یکطرفہ طور پر سندھ طاس معاہدہ ختم نہیں کر سکتا، اور پاکستان کا پہلگام واقعے سے کوئی تعلق نہیں۔

وزیر قانون اعظم نذیر تارڑ نے کہا کہ ملک کے مفاد پر ہم سب متحد ہیں، بھارت سندھ طاس معاہدے کی مسلسل خلاف ورزی کر رہا ہے، مگر قوم دشمن کے خلاف سیسہ پلائی دیوار ثابت ہوگی۔