لاکھوں روپے ماہانہ کمانے کا موقع! پاکستانی نوجوانوں کیلئے بڑی خبر

وزیراعلیٰ سندھ مراد علی شاہ نے 30 ہزار طلبہ کو گوگل اسکالرشپس دینے کا اعلان کیا ہے، جس سے طلبہ کو 70 ہزار سے 16 لاکھ روپے ماہانہ کمانے کا موقع ملے گا۔

تفصیلات کے مطابق سندھ حکومت، گوگل اور ٹیچ ویلی کے درمیان معاہدے کی تقریب وزیراعلیٰ ہاؤس میں منعقد ہوئی، جس میں وزیراعلیٰ سندھ نے 30 جامعات کے 30 ہزار طلبہ کو اسکالرشپ دینے کا اعلان کیا۔

وزیراعلیٰ سندھ نے 30,000 گوگل کیریئر سرٹیفکیٹ اسکالرشپس کا آغاز کیا اور اس موقع پر خطاب کرتے ہوئے کہا کہ سندھ حکومت ڈیجیٹل تعلیم اور ہنر میں انقلابی اقدامات کر رہی ہے۔ یہ اسکالرشپس نوجوانوں کے روشن مستقبل میں سرمایہ کاری ہیں، جس سے سندھ کی سماجی و اقتصادی ترقی کو فروغ ملے گا۔

مراد علی شاہ نے مزید کہا کہ سندھ حکومت اور گوگل کے درمیان اہم معاہدہ ہوا ہے، جس میں کم مراعات یافتہ طبقات اور خواتین کیلئے خصوصی کوٹہ مختص کیا گیا ہے۔ کورسز گوگل کے ماہرین نے تیار کیے ہیں اور یہ آن لائن مکمل کیے جا سکتے ہیں۔

انہوں نے بتایا کہ گوگل کیریئر سرٹیفکیٹ 3 سے 6 ماہ کی مدت کے کورسز ہیں اور سندھ کے طلبہ کو عالمی معیار کی تربیت حاصل ہوگی۔ اسکالرشپس میں 30 فیصد خواتین کا ہدف رکھا گیا ہے، جبکہ پسماندہ طبقات پر بھی توجہ دی جائے گی۔

وزیراعلیٰ سندھ نے یہ بھی کہا کہ گوگل اسکالرشپ یافتہ طلبہ 70 ہزار سے 16 لاکھ روپے ماہانہ تنخواہ حاصل کر رہے ہیں اور سندھ کے ہر نوجوان کیلئے مساوی تعلیمی مواقع فراہم کیے جائیں گے۔