اسرائیل کا حماس رہنما محمد سنوار کو ہلاک کرنے کا دعویٰ

اسرائیلی وزیر اعظم نیتن یاہو نے قانون سازوں کو بتایا ہے کہ غزہ میں حماس کے موجودہ سربراہ محمد سنوار ایک فوجی کارروائی میں ہلاک ہو چکے ہیں۔

بین الاقوامی خبر رساں اداروں کے مطابق، محمد سنوار، حماس کے سابق اعلیٰ رہنما یحییٰ سنوار کے چھوٹے بھائی تھے، جو گزشتہ برس جنوبی غزہ میں اسرائیلی حملے میں شہید ہو گئے تھے۔ ان کی شہادت کے بعد محمد سنوار نے غزہ میں حماس کی قیادت سنبھالی تھی۔

تاہم محمد سنوار کی ہلاکت سے متعلق واقعے کی جگہ، وقت اور تفصیلات فی الحال واضح نہیں ہیں، اور اسرائیلی حکام کی جانب سے بھی مکمل تصدیق کا انتظار کیا جا رہا ہے۔

دوسری جانب حماس نے تاحال محمد سنوار کی شہادت کی خبروں کی تردید یا تصدیق نہیں کی ہے۔

واضح رہے کہ یہ پہلا موقع نہیں ہے جب اسرائیل نے محمد سنوار کو مارنے کا دعویٰ کیا ہو۔ اس سے قبل کیے گئے تمام دعوے غلط ثابت ہو چکے ہیں۔