معروف کرکٹر کے اثاثے ضبط کرنے کا حکم جاری

بنگلہ دیش کرکٹ ٹیم کے سابق کپتان شکیب الحسن کے خلاف قانونی کارروائی میں شدت آ گئی ہے اور عدالت نے ان کے اثاثے ضبط کرنے کا حکم دے دیا ہے۔

شکیب الحسن، جو مفرور وزیراعظم شیخ حسینہ واجد کی جماعت عوامی لیگ کے ٹکٹ پر منتخب سابق رکن قومی اسمبلی بھی رہ چکے ہیں، کے خلاف 2016 میں ستکھیرا میں بنائی گئی ایک کیکڑے کی فارم کے سلسلے میں کارروائی کی جا رہی ہے۔ یہ فارم 2021 سے غیر فعال ہے اور کمپنی نے بینک سے قرض لیا تھا، جس کی ادائیگی کے چیکس ناکافی فنڈز کی وجہ سے باؤنس ہوگئے تھے۔

ڈھاکا کے ایڈیشنل چیف میٹروپولیٹن مجسٹریٹ ضیا الدین رحمان نے شکیب کے خلاف چیک باؤنس کیس میں جائیداد ضبط کرنے کا حکم دیا۔ بنگلہ دیشی بینک نے اکتوبر 2024 میں قانونی نوٹس جاری کیا تھا، اور دسمبر 2024 میں شکیب اور ان کی کمپنی کے دیگر عہدیداروں کے خلاف مقدمہ درج کیا گیا تھا۔

شکیب الحسن کو عدالت میں پیش ہونے کا حکم دیا گیا تھا، تاہم وہ گزشتہ برس دسمبر میں عدالت میں پیش نہ ہوئے، جس پر ان کے وارنٹ گرفتاری جاری کر دیے گئے۔

واضح رہے کہ شکیب الحسن گزشتہ سال حکومت مخالف مظاہروں کے دوران ایک نوجوان کے قتل کے مقدمے میں بھی نامزد ہیں، اور وہ اس وقت بنگلہ دیش سے باہر ہیں۔