واٹس ایپ نے اینڈرائیڈ صارفین کے لیے اسکین ڈاکیومنٹ کا نیا فیچر متعارف کرا دیا

ٹیکنالوجی کے میدان میں ایک اور اہم پیش رفت سامنے آئی ہے، جہاں واٹس ایپ نے اپنے اینڈرائیڈ صارفین کے لیے ایک نیا اور کارآمد فیچر متعارف کرا دیا ہے۔ اب صارفین واٹس ایپ ایپلی کیشن کے اندر ہی دستاویزات اسکین کرکے فوراً شیئر کر سکیں گے، وہ بھی بغیر کسی تھرڈ پارٹی ایپ یا اسکیننگ ٹول کے۔

یہ نیا فیچر اب تک صرف آئی فون (iOS) صارفین کے لیے دستیاب تھا، لیکن اب اینڈرائیڈ پلیٹ فارم پر بھی اس کا آغاز کر دیا گیا ہے۔ معتبر ٹیک ویب سائٹ WABetaInfo کے مطابق، یہ فیچر فی الحال بیٹا ورژن میں متعارف کرایا گیا ہے اور محدود صارفین کو دستیاب ہے۔

رپورٹ کے مطابق، واٹس ایپ نے اس فیچر کو شیئر ڈاکیومنٹس کے مینیو میں شامل کیا ہے، جہاں یہ "Scan Document” کے نام سے موجود ہوگا۔ اس آپشن کو منتخب کرتے ہی صارف کا ڈیوائس کیمرا فعال ہو جائے گا، جس کی مدد سے کوئی بھی کاغذی دستاویز اسکین کی جا سکتی ہے۔

اسکیننگ کے بعد، صارفین کو پریویو (Preview) دیکھنے کی سہولت بھی حاصل ہوگی، تاکہ وہ بھیجنے سے پہلے مطلوبہ تبدیلیاں کر سکیں۔ واٹس ایپ خود بخود تصویر کو پی ڈی ایف فارمیٹ میں تبدیل کرکے اسے بھیجنے کی سہولت دے گا، جو دستاویزات کی فوری اور آسان ترسیل کے لیے نہایت مفید ہے۔

ماہرین کا کہنا ہے کہ یہ فیچر صارفین کے وقت اور محنت کی بچت کرے گا، خاص طور پر ان کے لیے جو کام یا تعلیم کے حوالے سے روزمرہ بنیاد پر دستاویزات شیئر کرتے ہیں۔ واٹس ایپ جلد ہی اس فیچر کو تمام اینڈرائیڈ صارفین کے لیے عام کرنے کا امکان رکھتا ہے۔