وزیراعظم شہباز کی ترک صدر سے ملاقات کا اعلامیہ جاری

وزیراعظم ہاؤس پہنچنے پر ترک صدر کا وزیراعظم نے پرتپاک استقبال کیا۔ ترکیہ کے صدر نے اپنے اعزاز میں پیش کئے جانے والے گارڈ آف آنر کا معائنہ کیا، پی اے ایف کے لڑاکا طیاروں کا فلائی پاسٹ دیکھا اور وزیراعظم ہاؤس کے احاطے میں پودا لگایا۔

اعلامیے کے مطابق دونوں رہنمائوں کے درمیان دوطرفہ ملاقات ہوئی۔ جس میں باہمی دلچسپی کے علاقائی اور عالمی امور پر تفصیلی تبادلہ خیال کیا گیا۔ دونوں رہنماؤں نے پاک ترک دوطرفہ تعلقات کے مثبت انداز پر اطمینان کا اظہار کیا۔ تعلقات کو باہمی طور پر فائدہ مند اسٹریٹجک شراکت داری میں تبدیل کرنے کے عزم کا اعادہ کیا گیا۔

اعلامیے کے مطابق ترکیہ-پاکستان ہائی لیول اسٹریٹجک کوآپریشن کونسل کا ساتواں اجلاس ہوا، اجلاس کی مشترکہ صدارت دونوں رہنماؤں نے کی۔ دونوں اطراف کے متعلقہ وزراء نے تعاون کے مختلف شعبوں کا احاطہ کرنے والی نو مشترکہ قائمہ کمیٹیوں کی پیش رفت کی رپورٹیں پیش کیں۔ صحت اور آئی ٹی کی دو نئی مشترکہ قائمہ کمیٹیوں نے بھی اپنی رپورٹیں پیش کیں۔ پاک فوج کے سربراہ جنرل عاصم منیر نے بھی ملاقات میں شرکت کی۔

وزیراعظم نے نتیجہ خیز اقدامات، بہتر کاروباری معاملات اور دوطرفہ سرمایہ کاری کو آسان بنانے کی ضرورت پر زور دیا۔ ترک کمپنیاں پاکستان کے معاشی، تجارتی اور سرمایہ کاری کے منظر نامے کی بے پناہ صلاحیت سے فائدہ اٹھائیں۔ شہباز شریف نے کہا کہ زراعت، نئی اور ابھرتی ہوئی ٹیکنالوجیز، توانائی اور کان کنی سمیت دیگر شعبوں میں باہمی فائدہ مند تعاون کے لئے کام کریں۔

انہوں نے جموں و کشمیر کے تنازعہ پر صدر ایردوان کے مضبوط، مستقل اور اصولی موقف پر شکریہ ادا کیا۔ ترکیہ کے قومی مفاد کے بنیادی مسائل پر ترکیہ کے لئے  پاکستان کی مستقل حمایت کا اعادہ کیا۔

دونوں رہنماؤں کا اس دوران مشرق وسطیٰ کی حالیہ پیش رفت پر بھی تبادلہ خیال۔ دونوں رہنماؤں کا فلسطینی عوام کے ساتھ غیر متزلزل یکجہتی کا اظہار۔ وزیراعظم نے دو ریاستی حل کے لیے پاکستان کے مطالبے کا اعادہ کیا۔

دونوں رہنماؤں نے مشترکہ اعلامیہ پر دستخط کیے۔ دونوں رہنماؤں نے دو طرفہ تعاون کے مختلف شعبوں میں 24 مفاہمت کی یادداشتوں، پروٹوکولز اور معاہدوں کے تبادلے کا بھی مشاہدہ کیا۔ ترک صدر کے اعزاز میں اسلام آباد میں ایک مرکزی انٹرچینج کے نام کی تختی کی نقاب کشائی بھی کی۔