وزیراعظم کا وفاقی وزرا اور سروسز چیفس کے ہمراہ آئی ایس آئی کے ہیڈ کوارٹرز کا دورہ

پاکستان کی سلامتی اور خودمختاری کا عزم، وزیراعظم شہباز شریف نے وفاقی وزرا اور سروسز چیفس کے ہمراہ آئی ایس آئی کے ہیڈ کوارٹرز کا دورہ کیا۔ جہاں انہیں بھارتی جارحیت کے پیش نظر آپریشنل تیاریوں پر تفصیلی بریفنگ دی گئی۔

تفصیلات کے مطابق آئی ایس آئی کے ہیڈ کوارٹرز کے دورے پر قومی قیادت کو خطے کی تازہ صورتحال، خطرات، فوجی چیلنجز، ہائیبرڈ وارفیئر اور دہشت کے پراکسی نیٹ ورک سے متعلق آگاہ کیا گیا۔ وزیراعظم نے آئی ایس آئی کی پیشہ ورانہ مہارت کی تعریف کرتے ہوئے کہا کہ پاک فوج ہر خطرے سے نمٹنے کیلئے مکمل تیار ہے۔ پوری قوم اپنی بہادر افواج کے شانہ بشانہ کھڑی ہے۔

وزیراعظم شہبازشریف نے نائب وزیراعظم،وزیرخارجہ، وزیردفاع اور سروسز چیف کے ہمراہ نفٹیک کا دورہ بھی کیا۔ انہوں نے نیشنل انٹیلی جنس فیوژن اینڈ تھریٹ اسیسمنٹ سینٹر کی جدید عمارت کا افتتاح کیا۔

وزیراعظم نے کہا کہ دہشت گردی، غیر قانونی نیٹ ورکس اور بیرونی معاونت کیخلاف مؤثر حکمت عملی ضروری ہے۔ نفٹیک انسداد دہشت گردی کیلئے اہم قومی پلیٹ فارم ثابت ہوگا۔