وزیراعظم کی آرمی چیف کے ہمراہ سعودی ولی عہد سے ملاقات، اقتصادی تعاون بڑھانے پر اتفاق

وزیراعظم شہباز شریف کا چار روزہ دورہ سعودی عرب، آرمی چیف کے ہمراہ سعودی ولی عہد سے ملاقات کی۔ سعودی وزیر سرمایہ کاری اور دیگر حکام سے بھی ملے۔

پاکستان میں سعودی سرمایہ کاری لانے کا مشن، وزیراعظم شہباز شریف اور آرمی چیف جنرل سید عاصم منیر نے سعودی ولی عہد شہزادہ محمد بن سلمان سے ملاقات کی۔ علاقائی اور بین الاقوامی صورتحال پر تبادلہ خیال ہوا۔

دونوں ممالک کے سربراہان نے خطے میں استحکام اور خوشحالی کیلئے مشترکہ وژن کو فروغ دینے کیلئے مل کر کام کرنے پر اتفاق کیا۔ شہزادہ محمد بن سلمان نے سعودی عرب میں پاکستانی کمیونٹی کی نمایاں خدمات کو سراہا۔

وزیراعظم شہباز شریف نے سعودی وزیر سرمایہ کاری خالد الفالح اور اقتصادی امور کیلئے مشترکہ ٹاسک فورس کے سربراہ محمد التویجری سے بھی ملاقات کی۔ جس میں اقتصادی تعاون کو مضبوط بنانے، پاکستان میں مزید سعودی سرمایہ کاری لانے اور اہم شعبوں میں مشترکہ اقدامات کو تیز کرنے پر زور دیا گیا۔

وزیراعظم نے توانائی، انفراسٹرکچر، زراعت اور ٹیکنالوجی میں پاکستان کی وسیع صلاحیت کو اجاگر کیا۔ سعودی کاروباری اداروں کو خصوصی سرمایہ کاری سہولت کونسل کے تحت کاروباری مواقع تلاش کرنے کی دعوت دی۔

سعودی وزیر اور ٹاسک فورس کے سربراہ نے پاکستان کے ساتھ اقتصادی تعلقات کو مزید بڑھانے اور گہری دلچسپی کا اظہار کیا۔ وزیراعظم شہباز شریف مدینہ منورہ بھی گئے۔ جہاں گورنر مدینہ شہزادہ سلمان بن سلطان نے ایئرپورٹ پر اُن کا استقبال کیا۔