وزیرِاعظم شہباز شریف کا ڈیجیٹل معیشت کے فروغ پر زور

اسلام آباد — وزیرِاعظم شہباز شریف نے کہا ہے کہ حکومت کی اولین ترجیح معیشت میں شفافیت کو فروغ دینا اور ملک کو ڈیجیٹل اور کیش لیس سسٹم کی طرف لے جانا ہے۔

پیر کو کیش لیس اور ڈیجیٹل معیشت سے متعلق اعلیٰ سطحی اجلاس کی صدارت کرتے ہوئے وزیرِاعظم نے کہا کہ حکومت اور عوام کے درمیان مالیاتی لین دین کے تمام عمل کو ڈیجیٹل بنانا شفافیت کے ساتھ ساتھ عوام کی سہولت کا بھی ضامن ہوگا۔

انہوں نے ہدایت کی کہ چھوٹے اور درمیانے درجے کے کاروباری افراد (SMEs) کے لیے ڈیجیٹل سسٹم کو آسان بنایا جائے تاکہ وہ بھی اس نظام سے بھرپور فائدہ اٹھا سکیں۔

وزیرِاعظم نے قومی ڈیجیٹل ادائیگی پلیٹ فارم راست کے بورڈ آف گورنرز اور چیئرمین کی تقرری ستمبر تک مکمل کرنے کی ہدایت بھی جاری کی۔ انہوں نے کہا کہ راست کے بورڈ میں معیشت اور کاروبار کے ماہرین کو شامل کیا جائے تاکہ اس پلیٹ فارم کو مؤثر طریقے سے چلایا جا سکے۔

انہوں نے یہ بھی کہا کہ تمام سرکاری اداروں (SOEs) کو بھی ڈیجیٹل نظام کے دائرے میں لایا جائے تاکہ ان کے مالیاتی معاملات میں شفافیت اور بہتری لائی جا سکے۔

اجلاس کو بریفنگ کے دوران بتایا گیا کہ ملک میں ڈیجیٹل بینکنگ اور موبائل ایپلی کیشن استعمال کرنے والوں کی تعداد 95 ملین سے بڑھ کر 120 ملین ہو جائے گی، جبکہ ڈیجیٹل ادائیگیاں 7.5 ارب روپے سے بڑھ کر 15 ارب روپے تک پہنچنے کی توقع ہے۔

حکومت اگلے ماہ راست اور ڈیجیٹل ادائیگیوں سے متعلق ملک گیر آگاہی مہم کا آغاز کرے گی، جبکہ ڈیجیٹل پیمنٹ ڈیوائسز پر امپورٹ ڈیوٹی بھی ختم کر دی گئی ہے تاکہ ان کی دستیابی آسان بنائی جا سکے۔

اجلاس کو مزید بتایا گیا کہ آئندہ ایک ماہ میں ڈیجیٹل پیمنٹس انڈیکس بھی متعارف کرایا جائے گا تاکہ پاکستان کی معیشت کو ترقی یافتہ ممالک کے معیار پر لایا جا سکے۔