وفاقی وزیر خزانہ سینیٹر محمد اورنگزیب ہانگ کانگ روانہ، 18ویں ایشیائی مالیاتی فورم میں شرکت کریں گے

وفاقی وزیر خزانہ سینیٹر محمد اورنگزیب ہفتہ کو 18ویں ایشیائی مالیاتی فورم میں شرکت کے لیے ہانگ کانگ روانہ ہو گئے ہیں۔

وزارت خزانہ کی جانب سے جاری کردہ پریس ریلیز کے مطابق، اپنے دورے کے دوران سینیٹر اورنگزیب ایشیاء کے اہم مالیاتی اداروں کے اعلیٰ حکام اور حکومت کے اعلیٰ عہدے داروں سے ملاقات کریں گے۔

وزیر خزانہ ہانگ کانگ میں ہونے والے ایشیائی مالیاتی فورم سے خطاب کریں گے، جس میں وہ پاکستان کی اقتصادی صورتحال اور اس کے مستقبل کے امکانات کا تفصیلی جائزہ پیش کریں گے۔ علاوہ ازیں، وہ چینی حکام، مالیاتی ماہرین، سرمایہ کاروں اور کاروباری رہنماؤں سے ملاقاتیں کریں گے تاکہ پاکستان میں سرمایہ کاری کے امکانات پر بات چیت کی جا سکے۔

وزیر خزانہ اپنے دورے کے دوران چائنا انٹرنیشنل کیپٹل کارپوریشن لمیٹڈ، چائنا نیو انرجی اور ایشین انفراسٹرکچر انویسٹمنٹ بینک کے سربراہان سے بھی ملاقات کریں گے۔

سینیٹر اورنگزیب ہانگ کانگ کے خصوصی انتظامی علاقے کے چیف ایگزیکٹو جان لی کا-چیو سے بھی بات چیت کریں گے۔