ٹرمپ کی جانب سے 30 فیصد ٹیرف کی دھمکی "غیر منصفانہ معاہدہ” قرار، میکسیکو کا شدید ردعمل

میکسیکو سٹی – امریکی صدر ڈونلڈ ٹرمپ کی جانب سے میکسیکو پر 30 فیصد ٹیرف عائد کرنے کی دھمکی کو میکسیکو نے "غیر منصفانہ معاہدہ” قرار دیتے ہوئے مسترد کر دیا ہے۔

یہ اعلان جمعے کے روز امریکہ میں جاری مذاکرات کے دوران سامنے آیا، جس کے مطابق ٹیرف یکم اگست سے نافذ العمل ہوں گے۔ میکسیکو کی وزارتِ معیشت اور وزارتِ خارجہ نے ایک مشترکہ بیان میں اس فیصلے پر ناپسندیدگی کا اظہار کیا۔

"ہم نے مذاکرات کی میز پر واضح کیا کہ یہ ایک غیر منصفانہ معاہدہ ہے اور ہم اس سے متفق نہیں ہیں،” بیان میں کہا گیا۔

میکسیکو اس وقت ایسے متبادل معاہدے کی کوشش میں ہے جو دونوں ممالک کی معیشت اور ملازمتوں کو تحفظ دے۔ صدر کلاڈیا شین باوم نے اس حوالے سے امید ظاہر کی ہے کہ جلد ہی کوئی حل نکل آئے گا۔

"ہمیں یقین ہے کہ امریکی حکومت سے معاہدہ ہو جائے گا،” صدر نے ہفتے کے روز ایک عوامی تقریب میں کہا۔

میکسیکو کی معیشت کا زیادہ تر انحصار امریکہ کو برآمدات پر ہے، جو کہ اس کی کل برآمدات کا 80 فیصد ہے۔

ٹرمپ، جنہوں نے جنوری میں دوبارہ صدارت سنبھالی، میکسیکو پر غیر قانونی مہاجرت اور منشیات کی اسمگلنگ روکنے میں ناکامی کا الزام عائد کرتے ہوئے بارہا ٹیرف کو دباؤ کے ہتھیار کے طور پر استعمال کر چکے ہیں۔