پاکستان اسٹاک ایکسچینج میں ریکارڈ اضافہ

پاکستان اسٹاک ایکسچینج نئی بلندیوں پر، کے ایس ای-100 انڈیکس 126,000 کی ریکارڈ سطح عبور کر گیا

کراچی – پاکستان اسٹاک ایکسچینج (PSX) میں جمعرات کے روز زبردست تیزی دیکھنے میں آئی، جہاں کے ایس ای-100 انڈیکس نے پہلی بار 126,000 پوائنٹس کی تاریخی سطح عبور کر لی۔ وفاقی بجٹ 2025-26 کے بعد سرمایہ کاروں میں بڑھتے ہوئے اعتماد نے مارکیٹ کو نئی بلندیوں تک پہنچا دیا۔

دن کے دوران کاروبار میں 1,950.51 پوائنٹس کا اضافہ ہوا، جس کے بعد انڈیکس 126,303.19 پوائنٹس پر پہنچ گیا، جو کہ 1.57 فیصد مثبت تبدیلی کو ظاہر کرتا ہے۔

یہ تیزی اس حکومتی فیصلے کے بعد سامنے آئی جس میں کیپیٹل گین ٹیکس (CGT) اور ڈیویڈنڈ پر ٹیکس کی شرح کو برقرار رکھا گیا۔ مارکیٹ میں توقع کی جا رہی تھی کہ ان پر ٹیکس بڑھایا جائے گا، مگر ایسا نہ ہونے پر سرمایہ کاروں نے مثبت ردعمل دیا۔

بدھ کے روز بھی مارکیٹ میں تیزی دیکھنے کو ملی تھی، جب کے ایس ای-100 انڈیکس میں 2,328.24 پوائنٹس کا اضافہ ہوا تھا اور انڈیکس 124,352.68 پوائنٹس پر بند ہوا تھا، جو 1.91 فیصد کا اضافہ تھا۔